رووداو دیجیتاڵ
سوپای پاسدارانی ئێران بڵاویکردەوە، شەپۆلی 57ـەمی ئۆپەراسیۆنی (بەڵێنی راستگۆی 4)ی جێبەجێ کردووە و دەڵێت، ژمارەیەک ئامانج لە ئیسرائیل و بنکەکانی ئەمریکا لە ناوچەکەدا دەکاتە ئامانج.
بەپێی راگەیێندراوی سوپای پاسدارانی ئێران، لە کاژێر 12ی بەرەبەیانی ئەمڕۆ سێشەممە، 17ی ئاداری 2026 بە درووشمی "یا سیدالساجدین'' شەپۆلێکی نوێی هێرشی مووشەکی و درۆنییان بۆ سەر بنکە سەربازییەکانی ئەمریکا لە ناوچەکە و ئیسرائیل دەستپێکردووە.
بەپێی راگەیێندراوەکەی سوپای پاسدارن، لە شەپۆلەکەدا، سێ جۆر مووشەک بە ناوەکانی خەیبەر، زولفەقار، عیماد و قەدر بەکار هێنراوە و ئەم جارە کڵاوەی مووشەکەکان زیاد کراوە و لەگەڵ ژمارەیەکی زۆر درۆنی بۆمبڕێژکراو.
ئەم ئاڵۆزییە سەربازییانە لە کاتێکدایە، کە لە 28ـی شوباتی رابردووەوە ئەمریکا و ئیسرائیل هێرشیان کردە سەر ئێران. تاران وەک وەڵامێک بۆ ئەو هێرشانە، چەندین وڵاتی کەنداوی بە مووشەک و درۆن کردە ئامانج و پاساوی ئەوەی هێنایەوە کە هێزەکانی ئەمریکا خاکی ئەو وڵاتانە بۆ لێدانی ئێران بەکاردەهێنن.
بەگوێرەی ئامارەکانی مانگی سووری ئێران، لە ئەنجامی هێرش و بۆردوومانەکانی ئەمریکا و ئیسرائیلەوە تاوەکو ئێستا زۆرتر لە دوو هەزار کەس کوژراون. لە بەرامبەردا، سوپای ئەمریکا بە فەرمی کوژرانی 13 سەربازی خۆی لەم جەنگەدا راگەیاندووە.
