بەرگریی عێراق: هیچ هێزێکی بیانی لە بنکەی ئاسمانیی کەرکووکدا نییە

ئەمڕۆ چوارشەممە، 18ـی ئاداری 2026، وەزارەتی بەرگریی عێراق لە راگەیێندراوێکدا وردەکاریی هێرشەکەی دوێنێی بۆ سەر بنکەی ئاسمانیی کەرکووک ئاشکرا کرد و رایگەیاند: "بنکەکە رووبەڕووی هێرشێکی نامەردانە بووەتەوە و بەهۆیەوە ئاگر کەوتووەتەوە، بەڵام تیمە تەکنیکییەکان توانیویانە بە خێرایی کۆنترۆڵی بکەن و رێگری لە کەوتنەوەی زیانی گیانی بگرن."

وەزارەتی بەرگری رایگەیاندووە، بنکەی ئاسمانیی کەرکووک "تەواو عێراقییە" و چەندین فڕۆکەی جەنگیی وڵاتەکەی تێدایە و تەنیا کادیر و فڕۆکەوانی نیشتمانی تێدا کار دەکەن؛ دەشڵێت: "هیچ هێز یان کادیرێکی بیانی لەنێو بنکەکەدا بوونی نییە."

هەردی ساڵەیی، بەرپرسی راگەیاندنی فڕۆکەخانەی نێودەوڵەتیی کەرکووک، لەبارەی کاریگەریی هێرشەکە لەسەر بەشی مەدەنی بە رووداوی گوت: "هیچ زیانێک بەر بەشی فڕۆکەخانەی مەدەنی نەکەوتووە."

وەزارەتی بەرگریی عێراق ئەم هێرشەی وەک "هێرشێکی راستەوخۆ بۆ سەر تواناکانی فڕۆکەوانیی سوپا" وەسف کرد و رایگەیاند، "ئەم کارە دووژمنکارییانە ئامانجیان لاوازکردنی توانای بەرگریی وڵاتە و پێویستە بە تووندی رووبەڕووی هەر کەسێک ببنەوە کە یاری بە ئاسایش و سەروەریی عێراق دەکات."

سێشەممە، 17ـی ئادار، کاتێک دەنگۆی هێرشەکە بڵاوبووەوە، پۆلیسی کەرکووک رەتیکردەوە هیچ هێرشێک کرابێت و بە رووداوی راگەیاندبوو، "تەنیا رووداوێکی ئاگرکەوتنەوە بووە،" بەڵام راگەیێندراوەکەی ئەمڕۆی وەزارەتی بەرگری هێرشەکەی پشتڕاستکردەوە.