قاسم ئەعرەجی: کوڕەکانتان تەمبێ بکەن؛ عێراق مەیدانی یارییە چەپەڵەکانتان نییە

قاسم ئەعرەجی، راوێژکاری ئاسایشی نیشتمانیی عێراق، لە هەژماری فەرمیی خۆی لە تۆڕی کۆمەڵایەتیی ئێکس، لە پەیامێکدا روونی نەکردووەتەوە مەبەستی کێیە دەڵێت: "دەبێت دەستبەجێ هەموو جۆرە پارەدارکردن، هاندان و بانگەشەیەک بۆ فیتنە رابگرن."

ئەعرەجی، ئەو هەوڵانەی بە "پێشێلکارییەکی ئاشکرا" بۆ سەر یەکپارچەیی عێراق و ئاسایشی نەتەوەیی ناوبردووە و دەڵێت، "ئەو کەسانە بەپێی یاسای عێراق سزای زۆر تووند دەدرێن."

راوێژکاری ئاسایشی نیشتمانیی عێراق، بە دەستەواژەیەکی تووند کۆتایی بە پەیامەکەی هێنا و نووسیویەتی: "کوڕەکانتان تەمبێ بکەن، چونکە عێراق مەیدانی یارییە چەپەڵەکانی ئێوە نییە."

لە 28ی شوباتەوە کە هێرشی ئەمریکا/ئیسرائیل بۆ سەر ئێران دەستیپێکردووە، عێراق بووەتە گۆڕەپانێکی دیکەی جەنگەکە، ئێران بۆردوومانی هەرێمی کوردستان دەکات، ئەمریکا و ئیسرائیل بۆردوومانی گرووپە چەکدارەکان و حەشدی شەعبی دەکەن.  گرووپە چەکدارەکانیش بۆردوومانی هەرێمی کوردستان و هەندێک ژێرخانی وزەی عێراق، باڵیۆزخانە و کونسوڵخانەی ئەمریکا دەکەن.