گواستنەوەی عێراق بۆ رووداو: کەشتییەکی پڕ خۆراک گەیشت

رۆژی دووشەممە، 23ـی ئاداری 2026، مەیسەم سافی، گوتەبێژی وەزارەتی گواستنەوەی عێراق بە تۆڕی میدیایی رووداوی راگەیاند، "ئەو کەشتییە دوێنێ گەیشتووە و خۆراکی هەڵگرتووە، پرۆسەی گەشتە بازرگانییەکان لە دەریا بەردەوامە".  

گوتەبێژی وەزارەتی گواستنەوەی عێراق ئاماژەی بەوەکرد، "لەبەر هەستیاری دۆخەکە، ناتوانین وردەکاری هاتووچۆ و گەیشتنی کەشتییەکان ئاشکرا بکەین". 

هەر لەوبارەوە، ئەحمەد جاسم ئەسەدی، بەڕێوەبەری گشتیی کۆمپانیای گواستنەوەی دەریایی عێراق، رایگەیاند، کۆمپانیاکە زۆر بە وردی کار دەکات بۆ پاراستنی سەلامەتیی تیمی دەریایییەکان و کەشتییەکانی. بەردەوام و لە ماوەی 24 کاژێردا چاودێری وردی جووڵەی کەشتییەکان دەکەن بەپێی بەرزترین پێوەرە نێودەوڵەتییەکانی سەلامەتیی دەریایی.

ئەسەدی باسی لەوەش کرد ، ئەو هەوڵانە بە مەبەستی زامنکردنی ئاسایشی دەریاوانی و پاراستنی کارمەندەکانیانە لە هەموو جۆرە بارودۆخێکی جیاوازدا، بۆ ئەوەی گەشتە بازرگانی و دەریایییەکان بە بێ هیچ گرفتێک بکرێن.

لە 2ی ئادارەوە بەهۆی جەنگەوە، گەرووی هورمز لەلایەن هێزە چەکدارەکانی کۆماری ئیسلامیی ئێران بە رووی کەشتییە بارزگانییەکان و کەشتییەکانی گواستنەوەی سووتەمەنی داخراوە، بەو هۆیەوە نرخی سووتەمەنی و بەشێک لە کاڵا و خۆراکەکان لەسەر ئاستی جیهان بەرزبووەتەوە.