رووداو دیجیتاڵ
ئەم ساڵ بۆ حەوتەمین جار لە شاری ئەستەنبوڵ، فیستیڤاڵی کتێبی کراتخانە بەڕێوەدەچێت، کە تێیدا 31 دەزگای چاپ و بڵاوکردنەوە بەشدارن. فێستیڤاڵەکە وەک دەرفەتێک بۆ دەزگا چاپەمەنییە سەربەخۆکان و کەمینە نەتەوەییەکان بۆ نمایشکردن و فرۆشتنی کتێبەکانیان سەیر دەکرێت.
لە فیستیڤاڵی کتێبدا، سێ دەزگای چاپ و بڵاوکردنەوەی کوردی؛ وەشانەکانی نووبەهار، لیس و وەشانەکانی وەقفی ئیسماعیل بێشکچی، بە کتێبە کوردییەکانیانەوە ئامادەن.
لە فیستیڤاڵی کتێبدا، کەیت فێرگسۆن، وەرگێڕی بەریتانی، کە کتێبەکەی سەڵاحەدین دەمیرتاشی لە تورکییەوە وەرگێڕابووە سەر ئینگلیزی، ئامادە بوو.
کەیت ماوەی چەند ساڵێکە هەوڵ دەدات خۆی فێری کوردی بکات بۆ ئەوەی کتێبە کوردییەکان وەربگێڕێتە سەر ئینگلیزی. هەر بۆیەش حەز و سەرنجی هەمیشە لەسەر کتێبە کوردییەکانە.
کەیت فێرگسۆن، کە ماوەی 18 ساڵە لە ئەستەنبووڵ دەژی، ماوەی چەند ساڵێکە هەوڵ دەدات خۆی فێری کوردی بکات.
ئەو هەمیشە سەرنجی لەسەر کتێبە کوردییەکانە، چونکە ئامانجی کەیت ئەوەیە کە کاری وەرگێڕان لەنێوان کوردی و ئینگلیزیدا بکات.
کەیت، لەگەڵ وەرگێڕ ئامی ماری سپانگلەر، کتێبی "سەحەر"ـی سەڵاحەدین دەمیرتاشیان لە تورکییەوە وەرگێڕابووە سەر ئینگلیزی و ئەم وەرگێڕانە لە ساڵی 2018 دا لەلایەن پێنی نێودەوڵەتییەوە بە شایستەی خەڵات دانرابوو.
"بۆ وەرگێڕان فێری کوردی دەبم"
کەیت فێرگسۆن، لەبارەی ناسینی کورد و هۆکاری فێربوونی زمانی کوردی دەڵێت: "ناوم کەیت فێرگسۆنە. خەڵکی ئینگلتەرام. چەند ساڵێک لەمەوبەر چوومە پەیمانگای کوردیی ئەستەنبوڵ. کەمێک فێری کوردی بووم، بەڵام بۆ وەرگێڕان بەشم ناکات. هەر بۆیە بەردەوامم لەسەر کارکردن لەسەر زمانی کوردی. کاتێک هاتمە تورکیا ئاگاداری بوونی کورد نەبووم، بەڵام کاتێک زانیم کورد لێرە دەژین، گوتم بۆچی فێری زمانیان نەبم و دەستم بە فێربوونی کوردی کرد."
"کتێبە توێژینەوەییە تورکییەکان دەربارەی کورد سەرنجڕاکێشن"
عەزیز تەکین، بەرپرسی دەزگای چاپ و بڵاوکردنەوەی نووبەهار خۆشحاڵی خۆی لەبارەی بەشداریکردن دەربڕی و گوتی، "ئێمە وەک نووبەهار یەکەمجارە بەشداری لە فیستیڤاڵی کتێبی کراتخانە دەکەین. زۆر دڵخۆشین. پێشوازیش زۆر باشە، هەرچەندە بەقەد پێشانگا گەورەکان نییە، بەڵام لەبەرئەوەی زۆربەی ئامادەبووان تورکن، زیاتر کتێبە توێژینەوەییە تورکییەکان دەربارەی کورد سەرنجیان رادەکێشێت."
شێرف یاشار، بەرپرسی دەزگای چاپ و بڵاوکردنەوەی لیس دەڵێت، "ئێمە وەک دەزگای لیس هەموو ساڵێک دێینە ئەم فیستیڤاڵە. کراتخانەی ئیستەنبووڵ هەموو ساڵێک شوێن بۆ دەزگا چاپەمەنییە کوردییەکان تەرخان دەکات. زۆر دڵخۆشین. تا 25ـی ئایار لێرە دەبین."
فیستیڤاڵی کتێبی کراتخانە وەک پێشانگایەکی جێگرەوەی کتێب بۆ دەزگا چاپەمەنییە سەربەخۆکان سەیر دەکرێت.
بەهۆی ئەم فیستیڤاڵەوە، ئەو بەرهەمانەی کە خوێنەران کەمتر دەستیان پێدەگات، دەبینرێن (یان: بەردەست دەبن).
"کوردی نازانم بەڵام هەمیشە چاودێری بڵاوکراوە کوردییەکان دەکەم"
"ئێرە وەک پێشانگایەکی جێگرەوەی کتێبە."
ئۆزلەم کار، خوێنەرە و دەڵێت، "من کوردی نازانم بەڵام هەمیشە چاودێری بڵاوکراوە کوردییەکان دەکەم. ئێستاش سەیری ئەو بەرهەمە کوردییانە دەکەم کە وەرگێڕدراونەتە سەر تورکی."
ئەربینگۆل، خوینەرێکی دیکەیە و دەڵێت، "بەهۆی ئەم فێستیڤاڵەوە، ئاشنای ئەو کتێبانە بووم کە لە زمانی کەتەلۆنییەوە وەرگێڕدراوە.
کەم کەس دەیزانێت. هیوادارم دەزگای زیاتر بەشداربن و فیستیڤاڵەکە رەنگینتر بێت."
فیستیڤاڵی کتێبی کراتخانە کە لە 16ـی ئایار دەستیپێکردووە، تا 25ـی ئایار بەردەوام دەبێت.
فێستیڤاڵەکە کە ماوەی 10 رۆژ بەردەوام دەبێت، تیایدا چەندین بەرنامەی کوردی، گفتوگۆ و چالاکی هونەری بەڕێوەدەچن.
.jpg&w=3840&q=75)