رووداو دیجیتاڵ
یانەی باتمان پەترۆڵسپۆری باکووری کوردستان، یارییەکی مێژوویی هەیە و دەیەوێت هەنگاوێکی زۆر گرنگ لە بردنەوەی نازناوی ئەم وەرزەی خولی پلە دووی تورکیا نزیکببێتەوە.
لە رکابەرییەکانی گەڕی 31ـی خولی پلە دووی تورکیا، دوای نیوەڕۆی ئەمڕۆ کاژێر 15:00 باتمان پەترۆلسپۆر لەنێو یاریگە و هاندەرانی بەرامبەر یانەی موگلا یاریی دەکات و بردنەوەی ئەم یارییە یانەکەی باکووری کوردستان لە دەستکەوتێکی مێژوویی و گەورە نزیکدەکاتەوە.
بەر لە ئەنجامدانی یارییەکە باتمان لە پلەی یەکەمی ریزبەندی خولەکەیە و 73 خاڵی کۆکردووەتەوە، یانەی مولگا لە پلەی دووەمە بە 65 خاڵ و جیاوازییەکەیان 8 خاڵە.
باتمان پەترۆلسپۆر 17 یارییە هیچ دۆڕاندنێکی نییە دواینجار کە دۆڕابێت لە رۆژی 7-12-2025 بوو کاتێک بەرامبەر موگلا بە دوو گۆڵی بێبەرامبەر دۆڕا، لەو کاتەوە یانەکە نەدۆڕاوە و 118 رۆژە هیچ یانەیەک لە باتمان پەترۆلسپۆری نەبردووەتەوە.
جگە لەوەش دوایین 6 یاریی رابردوو، یانە سوورپۆشەکەی باکووری کوردستان هەموو یارییەکانی بردووەتەوە.
بۆ یارییەکەی ئەمڕۆ لە باتمان ئامادەکارییەکی زۆر کراوە، چەند رۆژێکە لە هەموو شوێنێک باس باسی یارییەکەیە، کەمپینی گەورە ئەنجامدراون و هاندەران بەلێشاو دەچن بۆ کڕینی درێسەکانی یانەکە.
هاندەرانی باتمان خۆیان ئامادەکردووە ئەمڕۆ یاریگەی یانەکەیان پڕبکەن لە رەنگی سوور و سپی و چاوەڕواندەکرێت زیاتر لە 15 هەزار هاندەر بۆ پاڵپشتیکردنی یانەکە لە یاریگە ئامادەبن.
بەبردنەوەی یارییەکە ئەمڕۆ یانەی باتمان پەترۆلسپۆر هەنگاوێکی زۆر گرنگ و مێژوویی لە بردنەوەی نازناوی خولی پلە دووی تورکیا نزیکدەبێتەوە، بەو پێیە جیاوازییەکەی لە رکابەرەکەی دەبێتە 11 خاڵ و لە چوار یاریی داهاتوودا پێویستیی بە تەنیا یەک خاڵ دەبێت بۆ یەکلاکردنەوەی نازناوی خولەکە و گەیشتن بە خولی پلە یەکی تورکیا.
ساڵی 2022 یانەی باتمان پەترۆلسپۆری باکووری کوردستان دوای 26 ساڵ لە خولی پلە سێی تورکیادا بووە پاڵەوان و بۆ خولی پلە دووی ئەو وڵاتە سەرکەوت، دوای نزیکەی چوار ساڵ لە گەیشتن بە خولەکە، یانەکە نزیکە دەستکەوتێکی دیکەی مێژوویی بباتەوە و خۆی بگەیێنێتە خولی پلە یەکی تورکیا و ببێتە پاڵەوانی پلە دوو.
یانەی باتمان پەترۆلسپۆر تەمەنی 66 ساڵە، یاریگەکەی بەناوی باتمان شەهیرە و 15 هەزار هاندەر دەتوانن لەنێو یاریگەکەیدا سەیری یارییەکان بکەن.
