فلیک سوپرایزی بۆ نیوکاسڵ هەیە

بارسێلۆنا لاپەڕەی خولی ئیسپانیای بەخێرایی داخست دوای سەرکەوتنە گەورەکەی بەرامبەر سێڤییا بەئەنجامی 5-2، تاوەکو تەواوی سەرنجی بخاتە سەر رووبەڕووبوونەوە یەکلاکەرەوەکەی بەرامبەر نيوکاسڵ یونایتد لە یاریی گەڕانەوەی قۆناخی16ـی خولی یانە پاڵەوانەکانی ئەورووپا، کە ئەمشەو کاژێر 20:45 بەکاتی باشووری کوردستان لە یاریگای کامپ نو بەڕێوەدەچێت.

دوای یەکسانبوونی یاریی چوون بەئەنجامی 1-1 لە ئینگلتەرا، هانزی فلیکی راهێنەر دەزانێت کە بلیتی سەرکەوتن بەدەست نایەت مەگەر بە ئاستێکی جەستەیی بەهێز و سەرنجێکی تاکتیکی بەرز نەبێت، بۆ خۆبەدوورگرتن لە سوپرایزەکانی رکابەرە ئینگلیزییەکە.

فلیک هەوڵ دەدات ئەو هەڵە بەرگرییانە راست بکاتەوە کە لە یاریی چووندا دەرکەوتن، ئەمەش بە سوودوەرگرتن لە گەڕانەوەی ئێریک گارسیا کە وەک بەرگریکاری راست 'باڵی راست' یاری دەکات، ئەمەش رێگە دەدات رۆناڵد ئاراوخۆ بگەڕێتەوە بۆ شوێنی ئاسایی خۆی لە دڵی بەرگریدا.

هەروەها راهێنەر بەردەوامە لە متمانەبەخشین بە دووانەی پاو کوبارسی و جێرارد مارتن، کە ئاستێکی جێگیر پێشکەش دەکەن و بوونەتە کۆڵەکەی سەرەکی هێڵی دواوە.

لە باڵی چەپدا، جواو کانسێلۆ بەردەوامە لە گێڕانی رۆڵی 'جۆکەر'، بەتایبەتی لە کاتی ئامادەنەبوونی باڵدێ، چونکە فلیک بەشێوەیەکی بەرچاو پشتی پێ دەبەستێت بۆ بونیادنانی یاری و دروستکردنی باڵادەستی لەسەر باڵەکان، دوای ئەو درەوشانەوە سەرنجڕاکێشەی لەم دواییانەدا نیشانی دا.

گەورەترین کێشە لەبەردەم فلیک لە هێڵی ناوەڕاستدایە، بەتایبەتی لەگەڵ ئامادەنەبوونی فرێنکی دی یۆنگ، بۆیە پەنا دەباتە بەر مارک بێرناڵی لاو لە تەنیشت پێدری بۆ گەرەنتیکردنی کۆنتڕۆڵ و خاوەندارێتی تۆپ.

لە شوێنی دروستکەری یاریشدا، راهێنەر لە نێوان فێرمین لۆپێز کە لە یاریی چووندا ئاستێکی پڕ وزەی پێشکەش کرد و دانی ئۆلمۆی خاوەن ئەزموون و کاریگەر، دوودڵە و هێشتا بڕیاری کۆتایی نەداوە.

بارسێلۆنا بەدروشمی 'هیچ جێگرەوەیەک بۆ سەرکەوتن نییە' دەچێتە ناو یارییەکەوە، یارییەک کە لەوانەیە چارەنووسی ئەم وەرزەی لە ئەورووپا دیاری بکات، لەکاتێکدا هەمووان بە پەرۆشەوە چاوەڕێی بڕیارەکانی فلیکن کە لەوانەیە کلیل یان سوپرایزێکی چاوەڕواننەکراو بێت.