هەموو شتێک لەسەر دێربیی مەدرید

دێربیی مەدرید یەکێکە لە بەهێزترین و دێرینترین رووبەڕووبوونەوەکانی مێژووی تۆپی پێ، نەک تەنیا لە ئیسپانیا، بەڵکو لەسەر ئاستی جیهان.  

*  ریال مەدرید ساڵی 1902 دامەزراوە. بە مێژوویی وەک یانەی چینی دەوڵەمەند و دەسەڵاتدار دەبینرێت، نازناوی  شاهانە  Los Blancos  لەلایەن شا ئەلفۆنسۆی سێیەمەوە بە یانەکە بەخشراوە.

*  ئاتلێتیکۆ مەدرید دوای ساڵێک و لە 1903 لەلایەن چەند قوتابییەکی باسکییەوە دامەزراوە. مێژوویەکەی زیاتر پەیوەستە بە چینی کرێکار و ئەوانەی دژی دەسەڵاتی باو بوون.

ململانێکە تەنیا تۆپی پێ نییە، بەڵکو گوزارشتە لە ململانێی نێوان 'خۆشگوزەرانی و سەرکەوتنی جیهانی' کە گوزارشتە لە ریال مەدرید بەرامبەر بە 'رۆحییەتی جەنگاوەرانە و قوربانیدان' کە گوزارشت لە ئاتلێتیکۆ مەدرید دەکات.

رکابەرییەکە لە دەیەی رابردوودا گەیشتە لووتکە، بەتایبەت لە خولی یانە پاڵەوانەکانی ئەورووپا.

*  فیناڵی لیسبۆن 2014.. دراماتیکیترین سات بوو کاتێک سێرخیۆ رامۆس لە خولەکی 92.48 گۆڵی یەکسانبوونی دژی ئاتلێتیکۆ مەدرید لە یاریی کۆتایی چامپیۆنزلیگدا تۆمارکرد، دواتر ریال مەدرید لە دوو گێمی زیادکراودا 4-1 بردییەوە و نازناوی دەیەمی بەدەستهێنا.

*  فیناڵی میلان 2016.. جارێکی دیکە لە یاریی کۆتایی چامپیۆنزلیگدا رووبەڕووی یەکدی بوونەوە و ئەمجارەش ریال مەدرید بە لێدانەکانی یەکلاکەرەوە نازناوەکەی بردەوە. 

*   باڵادەستیی ئەورووپی.. ریال مەدرید لە ساڵانی 2015 و 2017ـەش توانی ئاتلێتیکۆ مەدرید لە چامپیۆنزلیگ بکاتە دەرەوە.

لەو کاتەوەی دیێگۆ سیمیۆنی  لەساڵی 2011 بووەتە راهێنەری ئاتلێتیکۆ مەدرید، هاوسەنگیی دێربی گۆڕاوە:

*  ئاتلێتیکۆ مەدرید  پشت بە چۆلیزمۆ Cholismo دەبەستێت؛ فەلسەفەیەک کە جەخت لەسەر بەرگرییەکی پۆڵایین، رۆحییەتی بەرزی جەنگاوەرانە و هێرشی هەڵگەڕاوە دەکاتەوە.

*  ریال مەدرید پشت بە کەسایەتیی بەهێزی یانەکە، کوالێتیی تاکەکەسیی یاریزانەکان و توانای یەکلاکردنەوەی یارییە گەورەکان دەبەستێت لە هەر بارودۆخێکدا بێت.

*  لەڕووی مێژووییەوە ریال مەدرید لە ژمارەی بردنەوەکاندا لە لالیگا، جامی شای ئیسپانیا و چامپیۆنزلیگ لەپێشەوەیە.

*  گۆڵکاری مێژوویی دێربی  ئەستێرەی پۆرتوگالی کریستیانۆ رۆناڵدۆیە بە تۆمارکردنی 22 گۆڵ.

*   سانتیاگۆ بێرنابیۆ..  قەڵای سپیپۆشەکان، کە نۆژەنکرایەوە و بووەتە شاکارێکی جوانی ئیسپانیا و ئەورووپا.

*   میترۆپۆلیتانۆ.. یاریگای ئاتلێتیکۆ مەدریدە، کە بە کەشوهەوا گەرموگوڕ و پڕ لە جۆش و خرۆشەکەی دەناسرێتەوە.

*  ریال مەدرید  لەژێر سەرپەرشتی ئەلڤارۆ ئەربێلوا لە سەقامگیرییەکی تەواودا نییە و ئەگەرچی بەم دواییە لە چامپیۆنزلیگدا یەکێک لە بەهێزترین تیپەکانی ئەورووپای دەرکرد، کە مانچێستەر سیتییە و خۆی گەیاندە قۆناخی هەشتی پاڵەوانێتییەکە، بەڵام هێشتا نەگەیشتووەتە لووتکەی ئاستی و هەندێکجار تێبینی هەڵبەز و دابەز لە ئاستەکەیدا دەکرێت. گەڕانەوەی هەردوو ئەستێرەکەی لە پێکان،  کیلیان ئێمباپێ و جود بێلینگهام هێزێکی زیاتر بە تیپەکە دەبەخشن.

*   ئاتلێتیکۆ مەدرید، کە لە بازاڕی گواستنەوەکاندا کۆمەڵێک یاریزانی نوێی گواستووەتەوە، ئەویش وەک ریال مەدرید لە چامپیۆنزلیگدا خۆی گەیاندووەتە قۆناخی هەشت و هیواخوازە لەم یارییەدا لە ریال مەدریدی بباتەوە بۆ ئەوەی زیاتر لە رکابەریی بارسێلۆنا و ریال مەدرید لە لالیگادا دوورنەکەوێتەوە و بۆ ئەوەی ببێتە هاندەرێکیش بۆ رووبەڕووبوونەوەی بارسێلۆنا بەوڕەیەکی بەرز لە قۆناخی هەشتی چامپیۆنزلیگدا.

*  ریال مەدرید تاوەکو ئێستا 66 خاڵی لە لالیگادا کۆکردووەتەوە و بەجیاوازی 4 خاڵ لەدوای بارسێلۆنای پێشەنگەوەیە. زۆر پێویستە ئەمڕۆ لەسەر یاریگای خۆی و بەرامبەر هاندەرانی دێربیی مەدرید بباتەوە، چونکە دۆڕاندن واتا تا راددەیەک خۆبەدەستەوەدان بەرامبەر بارسێلۆنا.

*  ئاتلێتیکۆ مەدریدیش 57 خاڵی هەیە و پلەی چوارەمی ریزبەندیی خولەکەی گرتووە، بردنەوە بۆ ئەو واتا تا راددەیەک گەڕانەوە بۆ نێو رکابەرییەکە، بەڵام دۆڕاندن واتا بێهیوابوونی یەکجارەکی لە لالیگا.

*  هەر چۆنێک بێت هەردوو یانەکەی مەدرید دوایین دوو یارییەکانیان لە لالیگادا بردووەتەوە و ئەمڕۆ ئامانجی هەردووکیان بردنەوەیە، چونکە یەکسانبوون لە بەرژەوەندی رکابەریی یەکەمیانە، کە بارسێلۆنایە.