تەواوی چیرۆکی گۆرانیی "هەرە گولێ" کە جیهانی بە کوردی هێنایە سەما؛ پیاوە ماسکدارەکەی پشت گۆرانییەکە کێیە؟

(گولێ) تەنیا گۆرانییەکی سادە نییە کە وەک سەتان گۆرانیی دیکە لەنێو ئەلگۆریتمەکانی تۆڕە کۆمەڵایەتییەکاندا بزر ببێ. بەڵکو لە چەند هەفتەیەکی کورتدا، وشەی "کورمانجی"ی خستووەتە سەر زاری ملیۆنان کەس لە سەرتاسەری جیهان. کەسانێک کە رەنگە هەرگیز لە ژیانیاندا وشەیەکی کوردییان نەبیستبێ، لەپڕ لەنێو ئۆتۆمبێلەکانیاندا، لەسەر شەقامەکان و لەنێو ژوورە تاریکەکانیاندا، بە زمانێک سەما دەکەن کە ساڵەهایە هەوڵی بێدەنگکردنی دەدرێ. ملیۆنان مرۆڤ لە جیهان بەبێئەوەی بزانن، بوونەتە میوانی گۆرانییەکی گەلێکی دێرین، کە لە گۆرانییەکەدا ژیریی دەستکرد و رۆحی ئەو مرۆڤانەی دروستیانکردووە تێکەڵی یەکدی بوونە.

ئەوەی لە چیرۆکی بڵاوبوونەوەی گۆرانیی (گولێ)دا مرۆڤ تووشی رامانێکی قووڵ دەکات، بڵاوبوونەوە خێراکەی نییە، بەڵکو خۆشەویستبوونی گۆرانیبێژەکەیەتی. ئەو دەنگەی جیهانی هێناوەتە سەما، دەنگی ژنێکە بە ناوی (هیڤا)، کە لە هیچ گۆشەیەکی ئەم جیهانەدا نە دەژیت، نە هەناسە دەدات و نە هەستیشی هەیە. (هیڤا) کارەکتەرێکی ژیریی دەستکردە. بەرهەمی خەیاڵێکە کە لە ئەنجامی چەندین هەفتە کارکردنی بێوچان، بێخەوی و گەڕانی خوڵقێنەرانی بەدوای رەسەنایەتیدا لەدایکبووە. چیرۆکی پشت دروستکردنی ئەو گۆرانییە، ئەوە رووندەکاتەوە کە تەکنەلۆژیا هەمیشە بکوژی رۆح نییە، بەڵکو هەندێکجار دەتوانێ ببێتە ئامرازێک بۆئەوەی رۆحێکی ونبوو بگەڕێنێتەوە نێو جیهانە زیندووەکەی ئێمە.

لەپشت ئەو کارە هونەرییەوە، دوو گەنجی دیاسپۆرانشین هەن کە چیرۆکەکانیان هێندەی گۆرانییەکەیان سەرنجڕاکێشە. لووام مێسفین، مێشک و داینەمۆی پڕۆژەیەکی هاوبەشە بەناوی "پڕۆژەی 144". لەو ستۆدیۆیەدا کە لەگەڵ (بارش کۆرکمەز)ی هاوبەشی کاریان لەسەر ئەو گۆرانییە و گۆرانییەکانی دیکە کردووە، لووام بۆم باسدەکات کە ئامانجی پرۆژەکەیان "پێدانی دەنگە بەو کولتوورانەی کەس گوێیان لێ ناگرێت". ئەو و بارش، کە میوزیکژەنێکی لێهاتووە و بە ناوی هونەریی (پایکس) کار دەکات، شانیان داوەتە بەر پرۆژەیەکی درێژخایەن. لووام بە چاوانی پڕ لە شەوق و بریسکەی سەرکەوتن، باسی دەستپێکی کارەکەیان دەکات و دەڵێت: "تەنیا بۆ دۆزینەوەی ئەو دەنگە رەسەن و خاوە، چەندین هەفتە کارمان کرد. کاتێک یەکەمجار دەنگی (هیڤا)مان بیست، بێدەنگییەک باڵی کێشا بەسەرماندا. یەکسەر زانیمان ئەوە ئەو رۆحەیە کە دەمانەویست. هەموو شتێک لە بیرۆکەیەکەوە دەستیپێکرد. ئەویش ئەوە بوو کە هونەرمەندێکی کورد بخوڵقێنین و رۆح بکەینە بەر پرۆژەکەمان."

بۆ بارش و لووام (هیڤا) تەنیا کارەکتەرێک نییە بۆ کات بەسەربردن، بەڵکو گەیەنەری پەیامێکە. کاتێک ڤیدیۆکە لەنێو ئۆتۆمبێلەکەدا تۆمار کرا و بڵاوکرایەوە، هیچیان پێشبینیی ئەو زریانەیان نەدەکرد کە بەدوای خۆیدا هێناویەتی. لووام کاتێک بیر لەوکاتەوە دەکاتەوە، وەک ئەوەیە باسی روودانی موعجیزەیەک بکات: "دوای ئەوەی ڤیدیۆکەم لە تیکتۆک بڵاوکردەوە، بینیم کتوپڕ بوو بە 50 هەزار بینەر. دوای کەمێکی دیکە ئەپدەیتمان کردەوە، 10 هەزار بینەری دیکەی بۆ هات و گەیشتە 100 هەزار. ئەوکات زانیمان گۆڕانکارییەکی گەورە روودەدات. هەمووان بڵاویان دەکردەوە و پرسیاریان دەکرد: هیوا کێیە؟ لە کوێوە هاتووە؟ وەک لافاوێک بەسەرماندا هات."

لەنێو ئە و زریانە میدیاییەدا، پیاوێک هەیە رۆحی بەبەر ئەو گۆرانی و گۆرانیبێژەدا کردووە، بەڵام بڕیاری داوە لەپشت پەردە بمێنێتەوە. پایکس، کە ناوەکەی بە فەرەنسی واتە ئاشتی، میوزیکژەنێکی پیشەگەرە و لە تەمەنی 14 ساڵییەوە لەنێو دنیای هونەر و میوزیکدایە. ئەو شارەزایی لە ژەنینی 5 ئامێری جیاوازدا هەیە و میوزیکی بۆ گەورەترین ئەستێرە جیهانییەکان دروستکردووە. سەرەڕای ئەو هەموو نێوبانگ و سەرکەوتنە، پایکس هەڵیدەبژێرێ کە ماسکێک بپۆشێ و ئاڵای کوردستان لەسەر شانی دابنێت. بۆ ئەو، ماسکەکە تەنیا ئامرازێک نییە بۆ شاردنەوەی روخسار، بەڵکو هێمایەکە بۆ دەرخستنی برینێکی قووڵی نەتەوەکەی.

پایکس بە دەنگێکی پڕ لە ئارامی و بڕواوە پێمدەڵێ: "نامەوێ دەموچاوم پیشان بدەم، تاوەکو ئەوکاتەی دەگەمە ئامانجەکانم لە ژیاندا. یەکێک لەو ئامانجانە ئەوەیە کە لە ئاشتیدا بژیم و چیدیکە نەبینم گەلەکەم یان گەلانی دیکە دەچەوسێندرێنەوە. تاوەکو ئەوکاتە دەموچاوم پیشان نادەم." پایکس، کە ناوی راستەقینەی بارشە و هەر بە واتای ئاشتی دێت، هەڵگری خەمێکی کۆنە کە پشتاوپشت بۆی ماوەتەوە. ئەو دەیەوێ پەیامەکەی لە روخساری گەورەتر بێت. دەیەوێت جیهان گوێ لە برینەکانی کوردستان و گەلەکەی بگرن، ئینجا دەموچاوی دەربخات.

ئیشەکە وا ئاسان نییە

لە سەردەمێکدا دەژین کە زۆرکەس ترسیان لە ژیریی دەستکرد هەیە. ئەوان پێیانوایە مرۆڤایەتی بەرەو سڕینەوە دەبات. بەڵام خوڵقێنەرانی (هیڤا) و (گولێ) بۆچوونێکی دیکەیان هەیە. ئەوان پێیانوایە ژیریی دەستکرد تەنیا قاڵبێکە و ئەوەی رۆح دەخاتە نێو قاڵبەکەوە، مرۆڤە. لووام بەرگری لە کارەکەیان دەکات و دەڵێت: "هەندێککەس دەیانەوێت بڵێن ئەمە کارێکی هونەری نییە، بەڵام لەڕاستیدا ئەمە کارێکی زۆرە کە کردوومانە. تۆ لەوێ دادەنیشیت و چەندینجار پێداچوونەوە و گۆڕانکاری دەکەیت و بڕیاری بەردەوام دەدەیت. ئێمە میوزیکی خۆمان و ئامێرەکانی خۆمان بەکاردەهێنین، تاوەکو رۆحی مرۆڤی تێدا بێت." پایکسیش دەڵێ پرۆسەکە تەنیا نووسینی فەرمانێک (پرۆمپت)ێک نییە لە کۆمپیوتەرێکدا: "ئەگەر ئەوەندە ئاسان بووایە، هەزاران گۆرانی لەو شێوەیە دروست دەکران. ئێمە تەنها بۆ دەنگەکە، زیاتر لە دوو هەفتە و هەموو رۆژێک چەندین کاژێر گەڕاین و تاقیمانکردەوە. لە زۆربەی گۆرانییەکاندا میلۆدییەکان خۆم دروستم کردوون. بۆنموونە پارچەیەکی ساز دەژەنم و دەیدەم بە پرۆگرامەکە و پێیدەڵێم ئەو میلۆدییەم بۆ دروست بکە."

بۆ سەلماندنی ئەو رۆحە مرۆڤانەیە، پایکس لە هەڤپەیڤینێکیدا لە بەرنامەی دیاسپۆرا ئامێرێک بەکاردەهێنێت کە بۆنی مێژوو و خاکی لێدێت. تەمبوورێکی دارین کە تەمەنی سەرووی 40 ساڵە. کاتێک پەنجەکانی بە نەرمی بەسەر تەلەکانی ئەو تەمبوورەدا دەهێنێت، وەک ئەوەی گفتوگۆ لەگەڵ رابردوودا بکات، پێمدەڵێ: "ئەوە تەمبووری باوکم بوو، کە کۆچی دوایی کردووە. ئەو مامۆستای من بوو بۆ میوزیک و ژیان. من دەمەوێ بە کوردی بژیم و زمان و کولتوورەکەم بپارێزم." کاتێک گوێم لە ژەنینەکەی و قسەکانی بوو، تێگەیشتم کە ئەوەی بە (گولێ) جیهانی هەژاندووە تەنیا کۆد و ئەلگۆریتم نییە، بەڵکو دەنگی تەمبوورێکی کۆنە کە لەڕێگەی تەکنەلۆژیاوە خۆی خزاندووەتە نێو دڵی مرۆڤی سەتەی بیست و یەکەوە.

هەموو ئەو هەواڵە جوانانە لەنێو دیاسپۆرای کوردستانی روودەدەن. لە دیاسپۆرایەک کە هەرچەندە مرۆڤ تێیدا دەژیت و رەنگە هاووڵاتیی ئەو وڵاتانەش بێت، بەڵام هەمیشە هەست بە نامۆیی دەکات و بۆ پاراستنی ناسنامەکەی دەبێ دوو هێندە تێبکۆشێ. پایکس پەیامێکی بۆ گەنجانی دیاسپۆرا هەیە و دەڵێت: "دەبێ بەسەختی کار بکەین. دەبێ کار بۆ چاکە بکەین. زۆر کەس بە چاوێکی پڕ لە حوکمی پێشوەختەوە سەیری ئێمە دەکەن. من خۆم لێرە بەهۆی ئایین و کوردبوونەوە حوکمی پێشوەختەم لەسەر دراوە. دەبێ بە زانست و خوێندن بدرەوشێینەوە. ببینە نموونەی باش و لە هەموو شوێنێک ئاشتی بەرقەرار بکەین."

بارش و لووام بە گۆرانیی داهاتوویان، کە ناوی (زیندان و ژیان)ە و هەفتەی داهاتوو بڵاودەبێتەوە، دەیانەوێ جارێکی دیکە تینوێتیی جیهان بە گۆرانییەکی دیکەی کوردی بشکێنن. خۆشیان بەڵێنیان داومەتێ جاری داهاتوو کە یەکدیمان لە چیرۆکێکی سەرکەوتنی نوێدا بینییەوە، بە کورمانجی و تەنێ بە کورمانجی گفتوگۆ بکەین.