رووداو دیجیتاڵ
دۆناڵد ترەمپ، سەرۆکی ئەمریکا لە پەیامێکی نوێ و تووند دا هەڕەشەی وێرانکردنی ئەو بەشانەی ژێرخانی ئێرانی کرد کە هێشتا هێرشیان نەکراوەتەسەر. ترەمپ رایگەیاند، ئامانجی داهاتووی سوپای وڵاتەکەی پردەکان و وێستگەکانی کارەبای ئێران دەبن.
ترەمپ لە ترووس سۆشیاڵ نووسی: "سوپاکەمان، کە بە جیاوازییەکی زۆر گەورەترین و بەهێزترین سوپای جیهانە، هێشتا تەنانەت دەستی نەکردووە بە وێرانکردنی ئەوەی لە ئێران ماوەتەوە."
سەرۆکی ئەمریکا بە راشکاوی ئامانجە داهاتووەکانی سوپای وڵاتەکەی دیاریکرد و گوتی: "پردەکان ئامانجی داهاتوون، پاشان وێستگەکانی بەرهەمهێنانی کارەبا." ئەم هەڕەشەیە لە کاتێکدایە کە ترەمپ پێشتریش مۆڵەتی بۆ تاران درێژکردبووەوە بۆ کردنەوەی تەنگەی هورمز، ئەگەرنا وێستگەکانی وزە وێران دەکات.
دۆناڵد ترەمپ لە کۆتایی پەیامەکەی دا رووی دەمی کردە سەرکردە نوێیەکانی تاران و نووسی: "سەرکردایەتیی رژێمی نوێ دەزانن چی دەبێت بکرێ و دەبێت بە خێرایی بکرێ."
