Hewlêr (Rûdaw) - Malbata rojnamegerê Tora Medyayî ya Rûdawê yê winda Ferhad Hemo, ji bo koça dawî ya Birêvebirê Ofîsa Rûdawê yê Bexdayê Helkewt Ezîz peyameke sersaxiyê belav kir.
Malbatê di daxuyaniya xwe de got, "Ew hevkar û hevkarê rêya peyva azad bû."
Di peyama ku ji bajarê Qamişloyê ji Tora Medyayî ya Rûdawê re hatiye şandin de wiha hat gotin:
"Malbata rojnamegerê winda Ferhad Hemo bi xem û kovaneke kûr nûçeya koça dawî ya rojnamegerê ezîz û hevpîşeyê rêya peyva azad bihîst.
Wî di qezayeke trafîkê ya biêş de canê xwe ji dest da."
"Wendahiyeke biêş e"
Malbata Ferhad Hemo ji Tora Medyayî ya Rûdawê, malbata Helkewt Ezîz û hemû heval û hevpîşeyên wî re sersaxî xwest û wiha got:
"Koça dawî ya rojnamegerekî ku jiyana xwe ji bo gihandina rastiyê û xizmeta civakê terxan kiriye, ji bo tevahiya malbata ragihandinê windahiyeke biêş e."
Malbatê di dawiya peyamê de wiha daxwaz kir:
"Em bi dilekî tijî êş hevparê vê xema mezin in. Em ji Xwedê dixwazin ku wî bi rehma xwe şad bike û sebir û aramiyê bide malbat û hezkiriyên wî."
Bûyera trafîkê ya dilsoj
Birêvebirê Ofîsa Rûdawê yê Bexdayê Helkewt Ezîz doh di dema bicihanîna erkê xwe yê rojnamegeriyê de qeza kiribû.
Bûyer li ser rêya di navbera Bexda û Besreyê de çêbû û wî canê xwe ji dest da.
Cenazeyê wî îro li Goristana Rehîmawayê ya Kerkûkê hat veşartin
Ferhad Hemo kî ye?
Nûçegihanê Rûdawê Ferhad Hemo 15ê Kanûna Pêşîn a 2014an dema ku bi kameramanê xwe Mesûd Eqîl re li ser rêya sereke ya di navbera Qamişlo û Til Koçerê de amadekariya raporekê dikir, ketibû kemîna çekdarên DAIŞê.
Ew û kameramanê xwe ji aliyê DAIŞê ve hatin revandin.
Mesûd Eqîl 21ê Îlona 2015an hat berdan lê Ferhad Hemo heta niha jî winda ye.
Ferhad Hemo 10ê Îlona 1989an ji dayîk bûye. Wî demekê beriya ravandina xwe jiyana hevjîniyê pêk anîbû.
Ferhad Hemo beriya ku li Rûdawê bixebite, li Rojavayê Kurdistanê di çend dezgehên xwecihî de xebitîbû.
