Hewlêr (Rûdaw) - Serok Barzanî û Serokkomarê Demkî yê Sûriyeyê pêwendiyeke telefonî encam da û wan rêkeftina HSD û Şamê gotûbêj kir.
Serokkomariya Sûriyeyê naveroka pêwendiyeke telefonî ya di navbera Serok Barzanî û Serokkomarê Demkî yê Sûriyeyê Ehmed Şer de belav kir.
Hat ragihandin ku di pêwendiyê de behsa rûdanên dawî û rêkeftina di navbera Şam û Hêzên Sûriya Demokratîk (HSD) de hatiye kirin.
Li gorî daxuyaniyê, Serok Barzanî piştgiriya xwe ji bo rêkeftinê nîşan daye ku di navbera hikûmeta Sûriyeyê û Hêzên Sûriyeya Demokratîk (HSD) de hatiye îmzekirin.
Serok Barzanî diyar kiriye ku pêkanîna vê rêkeftinê ji bo dabînkirina yekparçeyî û aramiya Sûriyeyê pêwîstiyeke girîng e.
Li aliyê din, Ehmed Şer bal kişandiye ser hewldana dewleta Sûriyeyê ya ji bo parastina mafên neteweyî, siyasî û sivîl ên Kurdan.
Her wiha gotiye ku “hemû welatiyên Sûriyeyê li ber qanûnê wekî hev in û xwedî mafên hevpar in.”
Her du alî li ser girîngiya xurtkirina hevkarî û hevahengiya hevbeş a ji bo pêkanîna xalên rêkeftinê yek nêrîn bûn da ku li Sûriye û hemû herêmê aramî hebe.