Stenbol - Agirê Newrozê li bajarê herî mezin ê ku Kurd lê dijîn, li Stenbolê bi coşeke bêhempa hate geşkirin.
Newroza îsal a Stenbolê wekî yek ji pîrozbahiyên herî mezin ên salên dawî hat qeydkirin.
Tevî baran û hewaya sar, bi sedhezaran Kurdan li qada Yenîkapiyê dilên xwe bi agirê Newrozê germ kirin.
Coşa Yenîkapiyê û vegera Koma Amedê
Hêviyên ji bo pêvajoya çareseriyê ya ku didome û vegera Koma Amedê ya piştî 25 salan, mohra xwe li Newroza îsal dan.
Bi sedhezaran Kurdên li Stenbolê û bajarên derdorê bi cil û bergên Kurdî, bi tilîlî, slogan û govendên xwe qada Yenîkapiyê xemilandin.
Reqsa romantîk a du ciwanan
Di nava qerebalixiyê de dîmenên balkêş derketin holê. Du ciwanên bi navê Zeynep û Rohat ên ku bi cilên neteweyî beşdar bibûn, li ber çepik û stranên Newrozê bi şêweyekî romantîk reqisîn û bûn nîşaneya coşa ciwanan a di vê roja pîroz de.
Peyama beşdaran: Azadî û Yekîtî
Welatiyên ku ji her derê Stenbolê herikîbûn qadê, diyar kir ku Newroz ji bo wan roja azadiyê û nîşaneya yekîtiya neteweyî ye.
Zêdebûna alên rengîn û peyamên siyasî yên ji bo aştiyê, nîşan dan ku hêviyên xelkê yên ji bo paşerojê geş in.
Fînaleke bi dengê Koma Amedê
Piştî peyamên siyasî, Koma Amed piştî 25 salan careke din li Stenbolê derket ser dikê.
Xelkê li ber stranên komê bi coş û xiroş reqisîn û heta derengiya êvarê govend gerand.
Beşdaran piştî şahiyeke têr û tije, bi kêfxweşî berê xwe da malên xwe.
