رووداو دیجیتاڵ
دەشتی کەڵهوڕی، هونەرمەند، دەستیکردووە بە ئامادەکردنی پرۆژەیەکی هونەریی تایبەت بە شاری خانەقین و داوا لە هاونیشتمانییان دەکات بۆ دەوڵەمەندکردنی کلیپەکەی، وێنە مێژوویی و کولتوورییەکانی شارەکەی بۆ بنێرن.
دەشتی کەڵهوڕی بە تۆڕی میدیایی رووداوی راگەیاند: "سەرقاڵی ئامادەکردنی کلیپ و سروودێکی نیشتمانیم بۆ شاری خانەقین. ئەم کارە هەوڵێکە بۆ پاراستن و پێشاندانی دیمۆگرافیا، ناسنامە و کولتووری رەسەنی ئەم شارە."
ئەم هونەرمەندە داوا لە خەڵکی خانەقین دەکات، هەر وێنەیەکی جوان و بە کوالێتیی بەرزیان لایە کە گوزارشت لە جوانییەکانی شارەکە بکات، بۆی رەوانە بکەن؛ بەتایبەتی وێنەکانی پەیوەست بە:
-شادی و بۆنە کۆمەڵایەتییەکانی خانەقین.
-نەریتە کۆنەکان و رێوڕەسمی جەژنی نەورۆز.
-جلوبەرگی رەسەن و کولتووری خانەقینی.
دەشتی کەڵهوڕی ئاماژەی بەوە کردووە، هاونیشتمانییان دەتوانن وێنەکانیان لە رێگەی ئەکاونتی تێلیگرامی (@dashti_kalhori) بۆ بنێرن، جەختیشی کردەوە کە بەشداریی خەڵک لەم پرۆژەیەدا بایەخێکی زۆری هەیە بۆ ئەوەی بتوانرێت ناسنامەی خانەقین بە جوانترین شێوە پێشانی بینەران بدرێت.
