رووداو دیجیتاڵ
لە هەڵبژاردنی گشتیی سوێد، ئامادەیی کورد بە شێوەیەکی بەرچاو زیادی کردووە، بە شێوەیەک کە زیاتر لە 200 کورد خۆیان بەربژێر کردووە. هاوكات چاودێرانی هەڵبژاردن لە هەرێمی کوردستانەوە بەشداری لە چاودێرییکردنی پرۆسەی هەڵبژاردنەکانی سوێد دا دەکەن.
قادر کاسرگە، پەرلەمانتاری کورد لە پارتی سۆسیال دیموکراتی سوێد بە بەرنامەی (دیاسپۆرا)ی تۆڕی میدیایی رووداوی راگەیاند، رۆڵی کوردی سوێد لە کایە جیاوازەکاندا گەشەی کردووە و گوتی، "کوردانی سوێد بەشێکی گرنگن لە کۆمەڵگەی سوێدی. لە هونەر، کلتوور، سیاسەت و بازرگانیدا لە زۆر شوێن ئامادەییان هەیە. گەنجان و کەسایەتییە کوردەکان لە رێگەی سیاسەتەوە دەیانەوێت بەرپرسیارێتی هەڵبگرن بۆ ئاوەدانی و خۆشگوزەرانیی کۆمەڵگەی سوێد."
ئەو پەرلەمانتارە کوردە ئاماژەی بە رێژەی زۆری بەربژێرە کوردەکان کرد و گوتی، "لە زۆربەی شارەکان بەربژێری کورد لەسەر لیستی سۆسیال دیموکرات هەن و ژمارەیان زیاتر لە 200 کەسە. جێی شانازییە دوای هەر چوار ساڵ دەبینم ناوی کورد زیاتر دەبێت لە لیستەکاندا، هیوادارم لە هەڵبژاردنەکانی داهاتوودا ئەم ژمارەیە بێتە 300 بۆ 400 کەس."
لە لایەکی دیکەوە شۆڕش قادر رەحیم، نوێنەری حکومەتی هەرێمی کوردستان لە سوێد بە بەرنامەی دیاسپۆرای راگەیاند، "ساڵانی پێشوو سوێد چاودێری بۆ هەڵبژاردنەکانی کوردستان دەنارد، ئەمجارە چاودێرانی دەستەی هەڵبژاردنەکانی کوردستان دێنە سوێد و چاودێریی هەڵبژاردنەکان دەکەن."
