رووداو دیجیتاڵ
زیانە خەمڵێنراوەکانی راوەستانی بەرهەمهێنان لە کێڵگەی گازی کۆرمۆر لە هەرێمی کوردستان رۆژانە زیاتر لە 4.15 ملیۆن دۆلارە، ئەوەش تەنیا لە بەهای بەرهەمهێنانی گازی سروشتی، گازی ماڵان و شلە چڕەکان (کۆندێنسێت).
روانگەی (ئیكۆ عێراق) لە راگەیێندراوێکدا بڵاویکردەوە: "پێش بەئامانجگرتنی، کێڵگەکە رۆژانە نزیکەی 700 ملیۆن پێ سێجا گازی سروشتی بەرهەمدەهێنا، بە نرخێکی خەمڵێنراو کە دەگاتە 3.3 دۆلار بۆ هەر ملیۆن پێ سێجایەک، ئەوەش دەکاتە نزیکەی 2.31 ملیۆن دۆلار لە رۆژێکدا."
هێرشەکە کاژێر 23:10ـی یەکشەممە، 8ی ئەم مانگە کرا و کێڵگەی گازی کۆرمۆری لە قەزای چەمچەماڵ لە پارێزگای سلێمانی کردە ئامانج. بەهۆیەوە ئاگر لە کێڵگەکە کەوتەوە و کۆمپانیای دانەگازیش بەرهەمهێنانی گازی بە شێوەیەکی کاتی راگرت، ئەمەش کاریگەریی راستەوخۆی لەسەر کەمبوونەوەی کاژێرەکانی پێدانی کارەبا لە هەرێمی کوردستان داناوە.
روانگەکە ئاماژەی بەوەش کردووە: "کێڵگەی کۆرمۆر رۆژانە نزیکەی 1400 تەن گازی نەوتیی شلکراوە (LPG) بەرهەمدەهێنێت کە بە گازی ماڵان ناسراوە؛ بە نرخێکی خەمڵێنراو کە 720 دۆلارە بۆ هەر تەنێک، بەهاکەی دەگاتە نزیکەی 1.008 ملیۆن دۆلاری رۆژانە."
سەبارەت بە بەرهەمهێنانی شلە چڕە نەوتییەکانیش (کۆندێنسێت)، روانگەکە روونیکردووەتەوە: "ئاستی بەرهەمهێنانیان دەگاتە نزیکەی 22 هەزار بەرمیل لە رۆژێکدا، بە نرخێکی خەمڵێنراو بە 38 دۆلار بۆ هەر بەرمیلێک، کە دەکاتە 836 هەزار دۆلاری رۆژانە."
روانگەی ئیكۆ عێراق جەختیشی کردەوە کە ئەم خەمڵاندنانە تێچووی راوەستانی کارەکانی کۆمپانیا بەرهەمهێنەرەکان، کرێی هێڵەکانی گواستنەوە و ئەو زیانە ناڕاستەوخۆیانە ناگرێتەوە کە بەهۆی کەمبوونەوەی دابینکردنی گاز بۆ وێستگەکانی بەرهەمهێنانی کارەبا دروستدەبن.
بەپێی زانیارییەکان، لە ماوەی ساڵانی 2025 و 2026ـدا، کێڵگەی گازی کۆرمۆر 12 جار رووبەڕووی بۆردوومان و هێرش بووەتەوە.
عەلی فالح زەیدی، سەرۆکوەزیران و فەرماندەی گشتیی هێزە چەکدارەکانی عێراق، فەرمانی کرد بە پێکهێنانی لیژنەیەکی لێکۆڵینەوەی هاوبەش لەگەڵ لایەنە پەیوەندیدارەکانی هەرێمی کوردستان بۆ "بەدواداچوونی ورد" لەبارەی هێرشەکەی سەر کێڵگەی گازی کۆرمۆر لە سنووری پارێزگای سلێمانی.
