رووداو - تەندروستی
لە بەریتانیا دوای 20 ساڵ، بەکارهێنانی دەرمانێکی نوێ بۆ چارەسەری شێرپەنجەی هێلکەدان پەسند کرا. دەرمانەکە 2024 لە ئەمریکا پەسند کرا، بەڵام ئێستا لە بەریتانیا بەکاردێت و دراوەتە پاتریشیا هێڵ کە شێرپەنجەکەی هەیە.
پاتریشیا هیڵ، بەکارهێنەری دەرمانە نوێیەکەی شێرپەنجەی هێلکەدان دەڵێت: ''جۆرێک لە هیوا دەبەخشێت کە ئەگەری هەیە چارەسەرێک بۆ شێرپەنجەی هێلکەدان بدۆزرێتەوە. نەخۆشییەکی زۆر زۆر قورسە بۆ چارەسەرکردن''.
دەرمانەکە ناوی ئیلاهێرە، جۆرێکی چارەسەری کیمیاییە و تەمەنی تووشبووان نزیکەی چوار مانگ درێژ دەکاتەوە، ناشبێتە هۆی قژهەڵوەرین و ناڕێکیی دڵ، چونکە تەنیا خانە شێرپەنجەییەکان دەکاتە ئامانج.
ئێلاهێر زیاتر بۆ ئەو ژنانە بەکاردێ کە بە چارەسەری کیمیایی شێرپەنجەی هێلکەدانیان چارەسەر نابێت.
د. رۆوان میلەر، راوێژکاری نەخۆشییەکانی شێرپەنجە لە زانکۆی کۆلێژی لەندەن دەڵێت، ''ئەمە گرووپێکی نەخۆشن کە چارەسەرکردنیان زۆر قورسە و بەرگرییەکی زۆریان بەرامبەر چارەسەرە کیمیاییەکانی دیکە هەبووە. هیوادارین لە چەند ساڵی داهاتوودا ئەمە یەکەم دەرمان بێت کە باشبوونێکی گەورە بۆ نەخۆشەکان بدات، بەتایبەت لەڕووی چارەسەر، درێژیی ماوەی مانەوە و باشترکردنی کواڵیتیی ژیان''.
ساڵانە 300 هەزار تووشبووی شێرپەنڤەی هێلکەدان تۆماردەکرێن. ئەم دەرمانە موژدە دەبەخشێتە تووشبووان کە هەمیشە بەهێز بن و وەک پاتریشیا؛ دوای وەرگرتنی دەرمانەکەش، هێزیان هەبێت کە کارەکانی ماڵەوەیان و شێوازی ژیانیان خۆش بێت.
