پسپۆڕێکی WHO: گۆڕانی کەشوهەوا وەک حاڵەتێکی نائاسایی تەندروستیی جیهانی رابگەیێندرێت

رووداو - تەندروستی

بەرپرسێکی پێشووی رێکخراوی تەندروستیی جیهانی داوا دەکات گۆڕانی کەشوهەوا وەک حاڵەتێکی نائاسایی تەندروستیی جیهانی رابگەیێندرێت

رۆب بەتلەر، بەرپرسی باڵای پێشووی رێکخراوی تەندروستیی جیهانی، داوا دەکات رێکخراوەکە گۆڕانی کەشوهەوا وەک حاڵەتێکی نائاسایی تەندروستیی گشتیی جێی نیگەرانیی نێودەوڵەتی (PHEIC) رابگەیێنێت، کە بەرزترین ئاستی ئاگادارکردنەوەیە بۆ حاڵەتە تەندروستییەکان.

بەتلەر، دەڵێت کارەساتەکانی ئەم دواییەی کەشوهەوا لە زۆرێک لە وڵاتان، وەک لافاوەکانی نیپاڵ، شەپۆلەکانی گەرما لە ئەوروپا، وشکەساڵی لە ئەفریقا و ئاگرکەوتنەوەی دارستانەکان، ئەو راستییە دەسەلمێنن کە گۆڕانی کەشوهەوا هەموو پێوەرەکانی رێنماییە تەندروستییە نێودەوڵەتییەکانی تێپەڕاندووە بۆ ئەوەی وەک حاڵەتێکی نائاسایی بناسێندرێت.

بە گوتەی ئەو شارەزایە، راگەیاندنی حاڵەتی نائاسایی دەسەڵاتێکی بەهێزتر دەداتە وەزارەتەکانی تەندروستی بۆ دەستڕاگەیشتن بەو پارانەی بۆ رووبەڕووبوونەوەی گۆڕانی کەشوهەوا تەرخانکراون، هەروەها هاوئاهەنگی نێودەوڵەتی زیاتر دەکات و بەخشەرەکان هاندەدات بۆ خەرجکردنی زیاتر لە بواری ئامادەکاریی تەندروستیدا.