رووداو - تەندروستی
توێژینەوەیەکی نوێی زانکۆی کامبریج لە بەریتانیا دەریخستووە، خواردنی هێلکە لە ژەمی بەیانیاندا، رۆڵێکی گرنگ دەبینێت لە بەهێزکردنی توانای سەرنجدان و زیادکردنی هۆشیاریی مێشک بەدرێژایی رۆژ.
خواردنی بەیانی کە زۆر جار بەهۆی سەرقاڵی و خێرایی ژیانی رۆژانەوە پشتگوێ دەخرێت یان بە خواردنی خۆراکی نادروست دەگۆڕدرێت، بەگوێرەی پسپۆڕان دەبێتە هۆی دابەزینی کاتیی ئاستی سەرنج و ناتوانین بە باشترین شێوە کارەکانمان ئەنجام بدەین.
توێژەرانی زانکۆی کامبریج بۆیان دەرکەوتووە، هێلکە دەوڵەمەندە بە پڕۆتینی کواڵیتیی بەرز و مادەی کۆڵین، کە ئەم پێکهاتانە یارمەتیی خانەکانی مێشک دەدەن بۆ خێراتر گواستنەوەی زانیارییەکان و باشترکردنی یادەوەریی کورتماوە.
ئەم دۆزینەوەیە، رێگەیەکی خۆراکیی ئاسان و بەهێز بۆ دەستپێکی رۆژێکی چالاک دەخاتەڕوو، کە پێویستی بە سیستمی ئاڵۆز نییە، تەنها بە خواردنی هێلکەیەک بۆ ژەمی بەیانی، دەتوانرێت تەندروستیی جەستە و توانای هزری بە شێوەییەکی بەرچاو بەرز بکرێتەوە.
