رووداو- تەندروستی
توێژینەوەیەک لە بەریتانیا دەریدەخات، ئەو منداڵانەی بەلایەنی کەمەوە هەفتەی جارێک سەردانی پارک و شوێنەکانی یاری دەکەن، پەیوەندییە کۆمەڵایەتییەکانیان و دەرووندروستیان باشتر دەبێت.
توێژەرانی زانکۆی ئێکستەر لە بەریتانیا، بەدواداچوونیان بۆ زیاتر لە 4 هەزار منداڵی تەمەن 4 بۆ 11 ساڵان کردووە، دەرکەوتووە ئەو منداڵەی بەلایەنی کەمەوە هەفتەی جارێک بڕواتە پارک، بە تێکڕا 16.5% دەروونیان باشتر دەبێت.
د. مارک فێرگسۆن، سەرپەرشتیاری توێژینەوەکە رایگەیاند، "هاندانی منداڵان بۆ سەردانیکردنی پارک بەلایەنی کەمەوە هەفتەی جارێک، رێگەیەکی کردارییە بۆ پاڵپشتیکردنی دەروونیان."
د. مارک فێرگسۆن گوتیشی، "پارکەکان دەرفەت بۆ منداڵان دەڕەخسێنن بۆ ئەوەی چالاکیی جەستەیی و یاریی کرداری بکەن، کە یارمەتیدەرە بۆ دروستکردنی متمانەبەخۆبوون و سەربەخۆیی."
توێژینەوەکە جەختی لەوەش کردووەتەوە کە پێویستە کۆمەڵگەکان پارکی کواڵیتی باش و سەلامەتیان هەبێت کە بۆ هەموو خێزانەکان گونجاو بن، چونکە دەتوانن یارمەتیدەر بن لە کەمکردنەوەی نایەکسانی لە گەشەی منداڵاندا.
.png&w=3840&q=75)