توێژینەوەیەک لە بەریتانیا: جیاوازیی ئابووری و کۆمەڵایەتی کاریگەریی راستەوخۆی لەسەر تەندروستی هەیە

رووداو - تەندروستی

توێژینەوەیەک لە بەریتانیا دەریخستووە، جیاوازیی ئابووری و کۆمەڵایەتی کاریگەرییەکی راستەوخۆی لەسەر تەندروستی هەیە. دانیشتووانی ناوچە هەژارنشینەکانی ئینگلتەرا چەندین ساڵ زووتر لە دانیشتووانی ناوچە دەوڵەمەندەکان دەمرن.

پسپۆڕانی تەندروستیی گشتی نیشتمانی لە زانکۆ و ناوەندە زانستییەکانی بەریتانیا ئەنجامی توێژینەوەیەکی فراوانیان بڵاوکردەوە، تێیدا لێکۆڵینەوە لەسەر ئاماری پەیوەست بە تەندروستیی گشتی و رێژەی مردن لەسەر دەیان هەزار کەس لە سەرانسەری ناوچە جیاوازەکانی ئینگلتەرا کراوە.

بەپێی توێژینەوەکە، ئەوانەی لە ناوچە هەژارنشینەکان دەژین، بەهۆی هۆکارەکانی وەک نەبوونی خزمەتگوزاریی تەندروستیی یەکسان، خراپیی بژێوی ژیان و پیسبوونی ژینگە، زووتر لە دانیشتووانی ناوچە دەوڵەمەندەکان گیان لەدەستدەدەن.

پزیشکانی تەندروستیی نیشتمانی بەریتانیا ئاماژە دەدەن لەسەر پێویستیی دانانی پلانی بەپەلە لەلایەن حکومەت و دەسەڵاتدارانی تەندروستییەوە بۆ کەمکردنەوەی جیاوازییەکان، ئەمەش لەڕێگەی باشترکردنی ژێرخانی تەندروستی و دابینکردنی چاودێریی یەکسان بۆ هەمووان، بەتایبەتی لە ناوچە کەم داهاتەکان.