رووداو - تەندروستی
پسپۆڕێکی نەخۆشییەکانی پێست و جوانکاری رایدەگەیێنێت، پلازما بۆ سپیکردنەوەی پێست کاریگەریی نییە و باشترە بەبێ راوێژی پزیشک نەکرێت.
د. رۆشان دارا، پسپۆڕی نەخۆشییەکانی پێست و جوانکاری بە رووداوی راگەیاند، کێشانی جگەرە و نێرگەلە یەکێکە لەو خووە ناتەندروستانەی کە وادەکات چارەخواز سوود لە پلازماکە نەبینێت.
بەپێی د. رۆشان دارا، کاریگەریی پلازما راستەوخۆ دەرناکەوێت و نزیکەی دوو بۆ سێ هەفتە دەخایەنێت، هاوکات دەڵێت: ''ئەوانەی بۆ مەبەستی جوانکاری دەیکەن رەنگە دوو بۆ سێ 'جەلسە'ـیان بوێت''.
دەقی وەڵامەکانی د. رۆشان دارا، پسپۆڕی نەخۆشییەکانی پێست و جوانکاری لەبارەی سوود و بەکارهێنانەکانی پلازما بۆ پێست؛
رووداو: پلازمای خوێن چییە و بۆچی بەسوودە؟
د. رۆشان دارا: پلازما پێکهاتەیەکە لە خوێندا هەیە و بە تەکنیکی تایبەت لە خڕۆکە سوورەکان و پێکهاتەکانی دیکەی خوێنی کەسەکە جیادەکرێتەوە، یارمەتیی چاکبوونەوە و نوێ بوونەوەی ئەو شوێنە دەداتە کە بۆی بەکاردێت، جا بۆ پێست بێت یاخود بۆ هەڵوەرینی قژ بۆ چالاککردنی خانەکانی سەلکی موو و دووبارە گەشەکردنەوەی مووەکان.
رووداو: چ کەسێک پێویستە پلازما بکات؟ لە چ تەمەنێک گونجاوە پلازما بکرێت؟
د. رۆشان دارا: دەتواندرێت لە تەمەنی سەروو 12 ساڵییەوە بەکاربێت، بەتایبەت ئەگەر کێشەیەکی جیدی هەبێت وەکو هەوکردن، برین، زیپکە، هەڵوەرینی قژ و سووتاوی ئەوا لە تەمەنی بچووکتریش دەتواندرێت بەکاربێت.
رووداو: چ کەسانێک نابێت پلازمایان بۆ بکرێت؟
د. رۆشان دارا: تائێستا کەسانێکی دیاریکراو نییە کە پلازمای بۆ نەبێت، بەڵام زۆرجار ئەوانەی هەستیارییان بە پڕۆسەکە هەیە ناتواندرێت بۆیان بەکاربێت.
رووداو: ئایا پلازما بۆ سپیکردنەوەی پێست دەبێت؟
د. رۆشان دارا: نەخێر.
رووداو: ئەوانەی پلازمایان بۆ دەکرێت پێویستە چی بکەن بۆ ئەوەی پلازماکەیان سەرکەوتوو بێت؟
د. رۆشان دارا: چەند خوویەکی ناتەندروست وادەکات کەسەکە سوود لە پلازماکە نەبینێت وەکو کێشانی جگەرە و نێرگەلە و خواردنەوەی کحول.
رووداو: کاریگەریی پلازما دوای چەند رۆژ دەردەکەوێت، یان راستەوخۆ کاریگەرییەکەی دەردەکەوێت؟
د. رۆشان دارا: کاریگەرییەکەی دوای دوو بۆ سێ هەفتە دەردەکەوێت.
رووداو: راستە ئەگەر کەسێک پلازمای کرد ئیتر دەبێت ناوە ناوە بیکاتەوە؟ نێوان دوو پلازما دەبێت ماوەی چەند بێت؟
د. رۆشان دارا: ئەوانەی بۆ مەبەستی جوانکاری دەیکەن رەنگە دوو بۆ سێ 'جەلسەی' بوێت، بەڵام ئەوانەی کێشەکەیان جیدییە ئەوا پێویستە لەنێوان دوو بۆ شەش 'جەلسە' بیکەن و کاریگەریی دەبێت. نێوان دوو پلازمان دەکرێت دوو هەفتە بۆ 40 رۆژ بێت، بەڵام ئەگەر کێشەی کەسەکە گەورە و زۆر بوو ئەوا دەبێت لانیکەم 10 رۆژیان لەنێوان بێت.
رووداو: ئەو خووە ناتەندروستانە چین کە پێست تاریک دەکەن و درەوشانەوەکەی کەمدەکەنەوە؟
د. رۆشان دارا: خووەکان ئەمانەی خوارەوەن؛
- بەکارنەهێنانی دژەخۆر
- زۆر بەرکەوتنی خۆر
- بەکارنەهێنانی پاکژکەرەوەی پێست 'غسوول'
- بەکارنەهێنانی شێدارکەرەوە
- کەمخەوی
- کەمیی خواردنەوەی ئاو
- بەرکەوتنی سەرمای زۆر
- وشکبوونەوەی پێست
- کێشانی جگەرە و نێرگەلە
- زۆرخواردنی چەوری، شیرینی و شیرەمەنییەکان
رووداو: هەندێک شوێن لەگەڵ هایدرۆفەیشیاڵ پلازماش دەکەن ئایا ئەوە دروستە؟
د. رۆشان دارا: بەڵێ سوودی دەبێت و رەنگە ئەنجامی هایدرۆفایشیاڵەکەش باشتر دەربکەوێت.
