رووداو دیجیتاڵ
جاو کالێس، ئەو مامۆستا تانزانییەی کە بە شێوازە جیاواز و داهێنەرانەکەی لە جیهاندا ناسراوە، لەم هەڤپەیڤینە تایبەتەی تۆڕی میدیایی رووداودا باس لەوە دەکات چۆن توانیویەتی پیت و ژمارەکان لە رێگەی ئاواز و جووڵەوە لە مێشکی منداڵاندا بچەسپێنێت. لەم دیدارەدا، جگە لە ناساندنی شێوازی وانەگوتنەوەکەی، پەیامێکی تایبەت ئاراستەی قوتابییانی کورد دەکات و جەخت لەسەر گرنگیی خوێندن بە زمانی دایک وەک بنەمایەکی سەرەکیی پەروەردە دەکاتەوە.
رووداو: بەڕێز جاو کالێس بەخێربێی
جاو کالێس: زۆر سوپاس خاتوو نالین، بۆ میوانداریکردنم. ناوم جاو کالێسە، من لە تانزانیا مامۆستام، وانەی خوێندنەوە، نووسین و ژماردن دەڵێمەوە. هەروەها، میوزیک و داهێنان بەکاردەهێنم بۆ ئەوەی فێربوون خۆشتر و ئاسانتر بێت. زۆر دڵخۆشم کە لێرەم.
رووداو: شێوازی فێرکردنت زۆر سەرنجڕاکێشە، بۆچی ئەم رێگەیەت هەڵبژارد؟
جاو کالێس: بڕیارم دا ئەم شێوازە هەڵبژێرم، چونکە بۆم دەرکەوت کە منداڵان چێژ لە میوزیک، گۆرانیگوتن و جووڵە وەردەگرن. وەک لە ڤیدیۆکەمدا دەیبینن، من لە رێگەی میوزیکەوە پیت و دەنگەکان تێکەڵ بە یەکدی دەکەم. ئەمەش وایکرد فێربوون بۆیان زۆر ئاسان بێت.
رووداو: قوتابییەکانت چێژ لەم شێوازی فێرکردنە وەردەگرن؟
جاو کالێس: بەڵێ، بەڕاستی زۆر چێژی لێ وەردەگرن. وەک لە ڤیدیۆکەمدا دەیبینن، ئەو کەشە خۆشەی کە هەیە؛ تێیدا ئەوان دەجووڵێن، گۆرانی دەڵێن و پێکەوە فێر دەبن. ئەوەش وا دەکات کە من زۆر دڵخۆش بم، کاتێک دەبینم ئەوان فێر دەبن و چێژیشی لێ وەردەگرن.
رووداو: بۆ وەرزش و فێرکردن چی دەکەی؟ هەر خۆتی یان مامۆستای دیکەش هەن؟
جاو کالێس: من بڕیارم دا وەرزش و فێربوون تێکەڵ بکەم، بۆ ئەوەی فێربوون و فێرکردن ئاسان بکەم. تەنیا من نیم کە ئەم شێوازە بەکاردەهێنم، زۆر مامۆستای دیکەش هەن، بەڵام هەریەکەیان شێوازی تایبەتیی خۆی هەیە بۆ فێرکردنی منداڵان. من بڕیارم دا ئەم شێوازە هەڵبژێرم.
رووداو: چەند قوتابیت هەیە؟ وەزارەتی پەروەردەی تانزانیا چی دەڵێ؟
جاو کالێس: ئێستا 43 قوتابیم هەیە. سەبارەت بە وەزارەتی پەروەردەش، ئەوان بە فەرمی دانیان بە کارەکانمدا ناوە و زۆر بە باشیش پاڵپشتی لەم شێوازەی وانەگوتنەوەیەم دەکەن.
رووداو: خوێندن بە زمانی دایک بۆ تۆ و قوتابییەکانت چ مانایەکی هەیە؟
جاو کالێس: بە بڕوای من پەروەردە بە زمانی دایک یارمەتی منداڵ دەدات باشتر تێبگات. هەروەها وایان لێدەکات هەست بە ئاسوودەیی بکەن و لە کاتی فێربووندا متمانەیان بە خۆیان هەبێت. بۆ نموونە زمانی سەواحیلی، بەشێکی گرنگە لە کولتوور و ناسنامەمان. بۆیە با بەردەوام بین لە پاراستنی زمانی دایکمان.
رووداو: کورد دەناسی؟ چی بە قوتابییانی کورد دەڵێی؟
جاو کالێس: من زانیاریی زیاترم لەبارەی کوردەوە لە رێگەی ئەم دەرفەتەوە پێگەیشتووە. زمان و کولتووری کوردی زۆر گرنگن بۆ کوردەکان. ئەوەی دەمەوێت بە قوتابیانی کورد بیڵێم ئەوەیە کە؛ دەبێت شانازی بە زمان و کولتوورەکەی خۆتانەوە بکەن، لەوە نەترسن کە زمان و کولتوورەکەتان لەگەڵ جیهاندا بەش بکەن.
رووداو: زۆر سوپاس
جاو کالێس: زۆر سوپاس خاتوو نالین بۆ میوانداریکردنم بۆ ئەمڕۆ. زۆر دڵخۆشم کە دەبینم داهێنانەکەم دەگاتە کەسانی زیاتر لە دەرەوەی تانزانیا. ئەمە بۆ من شتێکی زۆر گەورەیە. هیوای رۆژێکی خۆشت بۆ دەخوازم.
.jpg&w=3840&q=75)
