رووداو -دیجیتاڵ
لە چەقەی گەرمای تاقەتپڕوکێنی بەغدا، مشتومڕی نێوان حکومەت و "بەرەی مقاوەمە" لەسەر پرسی چەکدانان گەیشتووەتە لووتکە. گرووپە چەکدارەکان مەرجی قورسیان بۆ رادەستکردنی چەکەکانیان داناوە و پرۆسەکەیان بە دەرچوونی تەواوەتی هێزەکانی ئەمریکا لە عێراق بەستووەتەوە؛ وادەی 30ـی ئەیلوولیش وەک دوا مۆڵەت بۆ ئەم پرسە دیاریکراوە.
هەوڵەکانی حکومەت بۆ چەکدانانی گرووپەکان، وایکردووە بەرەی مقاوەمە توندتر دەست بە چەکەکانیانەوە بگرن. ئەبو ئیزرائیل، جێگری فەرماندەی لیوای 40 لە هێزەکانی حەشدی شەعبی، تێڕوانینی گرووپەکان بۆ ئەم بابەتە روون دەکاتەوە و بە رووداوی راگەیاند: "شتێک نییە بەناوی رادەستکردن، بەڵکو ئەوەی هەیە رێکخستنەوەی چەکەکان و گەڕاندنەوەیانە بۆ نێو دەستەی حەشدی شەعبی؛ پێویستە ئەم گروپانە بە تەواوەتی تێکەڵی دامەزراوەی فەرمی بن، بەڵام بەبێ هیچ دەستێوەردانێکی سیاسی یان دەرەکی."
گرێی متمانە و هەژموونی واشنتن مەرجی ئەمریکا بۆ کەمکردنەوەی هەژموونی گرووپەکانی نزیک لە ئێران لە کابینەکەی زەیدیدا، وایکردووە تەنانەت ئەو لایەنانەشی چەکیان داناوە، بە گومانەوە بڕواننە پرۆسەکە. ئەبو توراب، پەرلەمانتاری کوتلەی بەدر لەم بارەیەوە دەڵێت: "ئەو گرووپانەی رەتیدەکەنەوە چەک رادەست بکەن، مافی خۆیانە، چونکە هیچ متمانە و دڵنیاییەکیان بە کردەوەکانی ئەمریکا لە عێراقدا نییە؛ ئەوان بێدەنگکردنی چەکەکانیان بە مانەوەی ئەمریکاوە دەبەستنەوە."
حکومەتەکەی زەیدی ئێستا لەبەردەم دوو بژاردەی سەختدایە؛ یان دەبێت گرووپە چەکدارەکان بێدەنگ بکات تاوەکو بتوانێت سەرمایە و کۆمپانیا جیهانییەکان بۆ عێراق رابکێشێت، یانیش دەبێت ببێتە بەشێک لەو ململانێیە ئاڵۆزەی لە ناوچەکەدا هەیە.
پوختەی تەنگژەی چەک لە بەغدا:
- وادەی کۆتایی: 30ـی ئەیلوول دوا وادەیە بۆ رادەستکردنی چەکی گرووپەکان.
- مەرجی مقاوەمە: کشانەوەی تەواوەتی هێزەکانی ئەمریکا لە عێراق.
- تێڕوانینی حەشد: رێکخستنەوەی چەک لە چوارچێوەی حەشد نەک رادەستکردن بە سوپا.
- پەیوەندیی ئابووری: ئەمریکا راکێشانی وەبەرهێنان بە کەمکردنەوەی هەژموونی گرووپە چەکدارەکان دەبەستێتەوە.
لە کاتێکدا هەردوو جەمسەرە سەرەکییەکەی عێراق (حکومەت و مقاوەمە) خەریکی نمایشی هێزن، کات بەرەو کۆتایی مانگی ئەیلوول دەڕوات؛ ئەو وادەیەی کە بڕیارە تێیدا چارەنووسی چەکی گرووپەکان یەکلا بکرێتەوە، هەرچەندە ئاڵۆزیی دۆخەکە وایکردووە گەیشتن بە رێککەوتن لە "گرێکوێرە" بچێت.
