رووداو دیجیتاڵ
حکومەتی عێراق وەزارەتی دارایی هەرێمی کوردستانی ئاگادار کردووەتەوە، کە بەهۆی کێشەی نەختینەوە ناردنی مووچە بۆ هەفتەی داهاتوو دواکەوتووە. سەرچاوەیەک لە وەزارەتی دارایی دەڵێت، بەغدا بەشێکی پارەکەی کۆکردووەتەوە و چاوەڕێ دەکرێت هەفتەی داهاتوو بڕە پێویستەکە تەواو ببێت.
رۆژی چوارشەممە، 12ـی ئابی 2026، سەرچاوەیەک لە وەزارەتی دارایی و ئابووریی هەرێمی کوردستان بە تۆڕی میدیایی رووداوی راگەیاند: "بەغدا ئاگاداریان کردووینەتەوە کە ئەگەر هەفتەی داهاتوو پارەی نەختینەی تەواو بوو و هەمووی بەردەست بوو، ئەوە مووچەی هەرێمی کوردستان دەنێرین."
سەرچاوەکەی رووداو گوتی: "ئێستا بەشێکی پارەکەیان کۆکردووەتەوە و بڕیارە هەفتەی داهاتوو بڕەکەی تەواو بکرێت، چونکە عێراق کێشەی نەختینەی هەیە."
پەرلەمانتارانی کورد لە بەغدا لە هەوڵی بەردەوامدان بۆ دابینکردنی شایستە داراییەکانی هەرێم. دوێنێ، سەلوان ئاکرەیی، ئەندامی پەرلەمانی عێراق بە رووداوی راگەیاند: "لە گفتوگۆماندا لەگەڵ وەزیری دارایی عێراق، بەڵێنی پێداین کە هەفتەی داهاتوو مووچەی هەرێمی کوردستان بنێرێت. وەزیر ئاشکرای کرد، کە تاوەکو ئێستا 600 ملیار دیناریان کۆکردووەتەوە و ئێستا خەریکی تەواوکردنی بڕەکەی دیکەن."
ناردنی مووچەی هەرێمی کوردستان لەلایەن بەغداوە بەستراوەتەوە بە زنجیرەیەک رێکار، لەوانە ناردنی لیستی مووچە و تەرازووی پێداچوونەوە، کە پێشتر لەلایەن وەزارەتی دارایی و ئابووریی هەرێمی کوردستانەوە رەوانە کراون. هەروەها ناردنی 120 ملیار دیناری داهاتی نانەوتی و نووسراوی وەزارەتی نەوت لەبارەی بەردەوامیی هەناردەکردن، بەشێکن لەو رێکارانەی پێشتر جێبەجێ کراون.
بەپێی رێککەوتنی هەولێر و بەغدا، دەبێت مانگانە حکومەتی فیدراڵ زیاتر لە 960 ملیار دینار بۆ هەرێمی کوردستان بنێرێت، بەو مەرجەی 120 ملیار دینار وەک داهاتی ناوخۆ لەو بڕە پارەیە ببڕدرێت.
