رووداو دیجیتاڵ
حکومەتی عێراق پڕۆژەیاسایەکی ئاراستەی پەرلەمان کردووە بۆ رێکخستنی چارەنووسی ئەو پارە و موڵکانەی لە چوارچێوەی هەڵمەتی رووبەڕووبوونەوەی گەندەڵیدا دەستیان بەسەردا گیراوە، دەیەوێت وەک سەرچاوەیەکی داهات مامەڵەیان لەگەڵدا بکات.
دوای دەستگیرکردنی ژمارەیەک بەرپرسی گەندەڵ و دەستبەسەرداگرتنی پارە و سامانەکانیان، حکومەتی عێراق هەوڵی یاسایی دەدات بۆ چارەنووسی ئەو پارە و موڵکانە.
زەهرا ساعدی، گوتەبێژی فراکسیۆنی بەرد لە ئەنجوومەنی نوێنەرانی عێراق بە رووداوی گوت: "لەسەر بابەتەکە، لەبەر ئەوەی یەکەمجارە بەو قەبارە گەورەیە روودەدات و پارەیەکی زۆر دەگەڕێنرێتەوە بۆ دەوڵەت، پێویستی بە رێکارێکی نوێ هەیە. پارەکان دەخرێنە ناو سندوقێکی تایبەت و ژمارەی حیسابی تایبەت بەخۆیەوە و لە پڕۆژەیاساکەدا رووندەکرێتەوە کە چۆن و بە چ شێوازێک خەرج دەکرێت، بەڵام جەختیکردەوە، "لەم کاتەدا هیچ کەسێک ناتوانێت مامەڵە بەو پارانەوە بکات، تەنانەت سەرۆکوەزیرانیش."
پڕۆژەیاساکە ئێستا لەبەردەم ئەندامانی پەرلەمانە. ئیخڵاس دلێمی، ئەندامی لیژنەی دارایی لە ئەنجوومەنی نوێنەرانی عێراق دەڵیت: "ئەنجوومەنی نوێنەران دانیشتنی لەبارەی ئەم یاسایەوە کردووە، چونکە لەم قۆناغەدا گرنگە یاساکە هاوتای هەنگاو و بەرەوپێشچوونەکانی حکومەت بڕوات. لیژنەی یاسایی پەرلەمان کار لەسەر پڕۆژەیاساکە دەکات و لیژنەی دارایی داوایان کردووە بەشدارییان پێبکرێت، چونکە "یاساکە لایەنی داراییشی تێدایە."
لە چوارچێوەی هەڵمەتی "بەرەبەیان" کە حکومەتی عێراق بۆ رووبەڕووبوونەوەی گەندەڵکاران دەستیپێکردووە، تاوەکو ئێستا زیاتر لە 50 بەرپرسی باڵا دەستگیرکراون. هەروەها دەست بەسەر زیاتر لە 260 ملیار دینار، 500 کیلۆگرام زێڕ، نزیکەی 70 ملیۆن دۆلار و دەیان موڵک و ئۆتۆمبێلی گرانبەهادا گیراوە.
دوای دەستبەسەرداگرتنی پارە و موڵکی بەرپرسانی گەندەڵ، چۆنیەتی مامەڵەکردن لەگەڵیان بووەتە پرسیاری سەرەکیی هاووڵاتییان و حکومەت پێویستە بەشێوەیەکی شەفاف ئەو دۆسیەیە یەکلایی بکاتەوە و دڵنیایی بداتە هەموو لایەک.
