رووداو دیجیتاڵ
ئەنجوومەنی پارێزگای نەینەوا بانگهێشتی بەڕێوەبەری دامەزراوەی شەهیدانی پارێزگاکە دەکات بەهۆی پێدانی مووچەی 12 هەزار کەس کە گوایە ئەندامی داعش بوون.
ئەو کێشەیە دوای ئەوە دەستیپێکرد کە عەبدولئیلا نائیلی، سەرۆکی دامەزراوەی شەهیدانی عێراق رایگەیاند، وردبینییان لە ئەنجوومەنی باڵای دادوەرییەوە بەدەست گەیشتووە و دەرکەوتووە کە زیاتر لە 17 هەزار داعشی کوژراو بە شەهید هەژمارکراون، کە 12 هەزاریان لە سنووری نەینەوا بوون.
ئەنجوومەنی پارێزگای نەینەوا رۆژی 16ی ئاب کۆبوونەوەیەکی تایبەتی لەبارەی ئەو پرسە کرد.
محەممەد کاکەیی، سەرۆکی لیژنەی ئەمنی لە ئەنجوومەنی پارێزگای نەینەوا بە تۆڕی میدیایی رووداوی راگەیاند: "بڕیاردراوە لە کۆبوونەوەی داهاتووی ئەنجوومەنی پارێزگادا بانگهێشتی بەڕێوەبەری شەهیدانی نەینەوا و چەند لایەنێکی دیکەی پەیوەندیدار بکرێ بۆ ئەوەی پرسیار لەبارەی ئەو 12 هەزار کەسە بکرێ و لێی بکۆڵینەوە".
لە 2014 بۆ 2017 شاری مووسڵ و بەشێکی زۆری پارێزگای نەینەوا لەژێر دەستی رێکخراوی داعش بوو.
محەممەد کاکەیی رایگەیاند، دیاریکردنی ئەو کەسانەی بە "شەهید" هەژمار دەکرێن لە رێگەی لیژنەی تایبەتمەندەوەیە و دادوەری تێدایە؛ ئاماژەی بەوەشکرد، کار لەسەر ئەوە دەکەن بزانن ئەو زانیارییە دروستە یان نا و ئەگەر دروست نەبێت، رێکاری یاسایی بەرامبەر سەرۆکی دامەزراوەی شەهیدان دەگیرێتەبەر.
