رووداو دیجیتاڵ
سەرۆکوەزیرانی عێراق داوای کرد کۆمپانیاکانی نەوت بە درێژایی 24 کاژێر کار بکەن. ئەوەش وەک هەوڵێک بۆ رووبەڕووبوونەوەی لێکەوتەکانی داخرانی تەنگەی هورمز و زیادکردنی توانای هەناردەکردنی نەوت.
رۆژی دووشەممە، 17ـی ئابی 2026، عەلی فالح زەیدی، سەرۆکوەزیرانی عێراق سەرپەرشتیی کۆبوونەوەیەکی فراوانی وەزارەتی نەوتی کرد کە تێیدا وەزیرانی دارایی و نەوت و بەرپرسانی باڵای وەزارەتەکە ئامادەی بوون. لە کۆبوونەوەکەدا تاوتوێی ئەو زیانە گەورانە کرا، کە بەهۆی داخرانی تەنگەی هورمزەوە بەر ئاستی هەناردەی نەوت و داهاتی عێراق کەوتوون.
عەلی فالح زەیدی جەختی لە پێویستیی دۆزینەوەی رێگەچارەی خێرا و کردەیی کردەوە و رایگەیاند: "پێویستە بەپەلە کار بۆ نۆژەنکردنەوەی بۆرییەکانی گواستنەوەی نەوت بکرێت و گرێبەستی نوێ لەگەڵ کۆمپانیا جیهانییەکان بۆ بەبازاڕکردنی نەوت واژۆ بکرێت."
سەرۆکوەزیرانی عێراق رێنمایی دا کە کارەکانی بەرهەمهێنان و هەناردەکردن رانەوەستن و کۆمپانیا نەوتییەکان بەردەوام بن لە کارکردن بۆ ئەوەی دڵنیایی لە بەردەوامیی داهاتی دەوڵەت و جێگیریی ئابووری بدرێت. گوتیشی: "دەبێت ئەم قەیرانەی ئێستا بکەینە دەرفەتێک بۆ سەرکەوتن لەڕێگەی پەرەپێدانی ژێرخانی نەوتی و فراوانکردنی دەروازە جێگرەوەکانی هەناردەکردن."
لە کۆبوونەوەکەدا چەندین ستراتیژی و پلانی نوێ بۆ مامەڵەکردن لەگەڵ قەیرانی تەنگەی هورمز خرانەڕوو، بە مەبەستی رێگری لە پاشەکشەی زیاتری ئابووریی عێراق و پاراستنی بودجەی وڵات لە مەترسییەکان.
عێراق زیاتر لە 85%ـی نەوتەکەی لەڕێگەی بەندەرەکانی بەسڕە و تەنگەی هورمزەوە بۆ بازاڕەکانی جیهان رەوانە دەکات.
