رووداو دیجیتاڵ
سەرۆکایەتیی پەرلەمانی عێراق سەرکۆنەی هێرشەکەی سەر نووسینگەی تایبەتی مەسرور بارزانی، سەرۆکی حکومەتی هەرێمی کوردستان و شوێنی نیشتەجێبوونی بەڕێوەبەری ئاژانسی پاراستن دەکات و رایدەگەیێنێت، ئاسایشی هەرێمی کوردستان بەشێکی جیانەکراوەیە لە ئاسایشی عێراق.
ئەمڕۆ دووشەممە 17ـی ئابی 2026، سەرۆکایەتیی پەرلەمانی عێراق لە راگەیێندراوێکدا هێرشەکەی وەک "پێشهاتێکی مەترسیدار و رەتکراوە" وەسف کرد و وەک ئاماژەی پێدەکات، "ئەو هێرشە دەستدرێژییە بۆ سەر سەروەریی عێراق و ئاسایشی هاووڵاتییان و سەقامگیریی دامەزراوەکانی دەوڵەت."
لە راگەیێندراوەکەدا هاتووە: "ئاسایشی هەرێمی کوردستان بەشێکی جیانەکراوەیە لە ئاسایشی عێراق، بەئامانجگرتنی هەر بەشێکی خاکەکەی یان بەرپرس و دامەزراوەکانی، بە هیچ شێوەیەک و لەژێر هیچ ناو و پاساوێکدا قبووڵکراو نییە."
سەرۆکایەتیی پەرلەمانی عێراق داوای لە حکومەتی فیدراڵی و دەزگا پەیوەندیدارەکان کردووە "بەپەلە" لێکۆڵینەوە لە وردەکارییەکانی ئەو هێرشە بکەن و رێکاری پێویست بگرنەبەر بۆ پاراستنی سەروەریی نیشتمانی و رێگری لە دووبارەبوونەوەی دەستدرێژیی لەو شێوەیە.
هەر لە راگەیێندراوەکەدا، پەرلەمانی عێراق جەختی لە هەڵوێستی خۆی کردووەتەوە بۆ دوورخستنەوەی عێراق لە ململانێ و ئاڵۆزییەکانی ناوچەکە و دەڵێت: "پێویستە رێز لە سەروەری و یەکپارچەیی خاکی عێراق بگیرێت و پەنا بۆ دیالۆگ و کەناڵە دیپلۆماسییەکان ببرێت بۆ چارەسەرکردنی ناکۆکییەکان، بەجۆرێک کە ئاسایشی عێراق بپارێزرێت و ناوچەکە لە ئاڵۆزیی زیاتر بەدوور بێت."
دژەتیرۆری کوردستان لەبارەی هێرشەکەوە رایگەیاند بەگوێرەی زانیارییەکانی دژەتیرۆری کوردستان، بەرەبەیانی رۆژی دووشەممە 17ی ئابی 2026، لە کاتژمێر 00:28، دوو درۆنی بۆمبڕێژکراو لە جۆری (حەدید-110) لە دیوی سنووری وڵاتی ئێرانەوە ئاراستەی بارەگای نووسینگەی تایبەتی سەرۆکوەزیرانی هەرێمی کوردستان و شوێنی حەوانەوەی بەڕێوەبەری ئاژانسی پاراستن لە قەزای پیرمامی پارێزگای هەولێر کران، بەڵام هیچ زیانێکی گیانییان لێ نەکەوتەوە.
