.jpg&w=3840&q=75)
رووداو دیجیتاڵ
وەزارەتی نەوتی عێراق رایگەیاند، کەشتییەکی هەڵگری بەنزین گەیشتووەتە بەندەرەکانى عێراق و بەم نزيکانە کێشەی کەمى بەنزین لە وێستگەکان چارەسەر دەبێت.
چوارشەممە 19ی ئابی 2026، سەلیم روکابی، گوتەبێژی وەزارەتی نەوتی عێراق بە تۆڕی میدیایی رووداوی رایگەیاند: "کەشتییەکی هەڵگری بەنزینی هاوردەکراو گەیشتە بەندەرەکانی عێراق و دەست بە داگرتنی بارەکەی کراوە".
بە گوتەی سەلیم روکابی، ئەو بەنزینە لەلایەن کۆمپانیای بەبازاڕکردنی نەوتی عێراق (سۆمۆ) بە نرخی رکابەرى هاوردە کراوە.
عێراق رۆژانە نزیکەی 32 ملیۆن لیتر بەنزین بەرهەم دەهێنێت، بەڵام ئەو بڕە بەشی پێویستیی ناوخۆ ناکات، بەتایبەت لە وەرزی هاویندا.
گوتەبێژی وەزارەتی نەوتی عێراق رایگەیاند، بەهۆی گەیشتنی ئەو کەشتییەوە، بەم نزيکانە کێشەی کەمیی بەنزین و ناردنی بۆ وێستگەکان چارەسەر دەبێت و وەزارەتەکەشی پەرۆشە بۆ ئەوەی تەواوی پێویستیی ناوخۆ لە بەنزین بەرهەمبهێنێت.
سەلیم روکابی دەڵێت، ئەو کێشەیەی ئێستا هەیە لە بەنزیندا بەهۆی دواکەوتنی یەکێک لە کەشتییەکانی گواستنەوەی بەنزینی موحەسەن بووە بۆ بەندەرەکانی باشووری عێراق و ئەوەش کاریگەریی هەبووە لەسەر خشتەی بەتاڵکردنی بارەکە و ناردنی بۆ وێستگەکان.
