رووداو دیجیتاڵ
دەستەی حەشدی شەعبی رایگەیاند، ئەو کێشە و "لێکتێنەگەیشتنەی" لەبارەی دەستگیرکردنی ژمارەیەک لە چەکدارەکانیان دروست ببوو چارەسەر کراوە و سەرجەم دەستگیرکراوەکانیش رادەستی ئاسایشی حەشد کراونەتەوە. دەزگای دژەتیرۆریش دەنگۆی دەستگیرکردنی بەرپرسێکی باڵای حەشد رەتدەکاتەوە.
رۆژی دووشەممە، 24ی ئابی 2026، موهەننەد عیقابی، بەڕێوەبەری راگەیاندنی حەشدی شەعبی لە راگەیێنراوێکدا رایگەیاند: "ئەو لێکتێنەگەیشتنەی لەبارەی دەستگیرکردنی برایانمان لە حەشدی شەعبی دروست ببوو، یەکلا کراوەتەوە و ئێستا رادەستی ئاسایشی حەشدی شەعبی کراون، تاوەکو لەوێوە بەدواداچوون بۆ دۆسیەکانیان لە دادگا بکرێت."
ئەم روونکردنەوەیەی حەشدی شەعبی دوای ئەوە دێت، کە لە چەند کاژێری رابردوودا میدیاکانی نزیک لە گرووپە چەکدارەکان دەنگۆی ئەوەیان بڵاوکردەوە کە هێزەکانی دەزگای دژەتیرۆری عێراق، ئەکرەم تەمیمی، ئەندامی ئەرکانی دەستەی حەشدی شەعبییان دەستگیرکردووە، ئەوەش جۆرێک لە گرژیی لە نێوان هەردوولادا دروست کردبوو.
دەزگای دژەتیرۆری عێراق لە راگەیێنراوێکدا سەرجەم ئەو دەنگۆیانەی رەتکردەوە و رایگەیاند، ئەوەی لەبارەی دەستگیرکردنی ئەو بەرپرسەی حەشدەوە بڵاوکراوەتەوە "دوورە لە راستییەوە".
دەزگای دژەتیرۆر جەختی لەوەش کردەوە، کە ئەرکی ئەوان تەنیا بنبڕکردنی تیرۆرە و سەرجەم جووڵە و ئۆپەراسیۆنەکانیشیان "بە پشتبەستن بە فەرمانی دادوەری و رەزامەندیی نووسینگەی فەرماندەی گشتیی هێزە چەکدارەکان" دەکرێن.
