رووداو - دیجیتاڵ
سەرۆکایەتیی پەرلەمانی عێراق رەزامەندیی دا، نووسینگەیەک لە قەزای ئاکرێ لە سنووری پارێزگای دهۆک بکرێتەوە.
نووسراوی رەزامەندیی سەرۆکایەتى پەرلەمانی عێراق بۆ کردنەوەی ئەو نووسینگەیە، ئەمڕۆ چوارشەممە 26ی ئابی 2026، لەلایەن سەفوان گەرگەری، ئەمینداری گشتیی پەرلەمانی عێراقەوە دەرکراوە.
سەلوان ئاکرەیی، ئەندامی پەرلەمانی عێراق کە لە پشکی ئەو قەزایەیە بە تۆڕی میدیایی رووداوی راگەیاند، هەوڵی کردنەوەی ئەو نووسینگەیە بۆ ئەوە بوو کە هاووڵاتییانی ناوچەکە ئەگەر کێشەیەکیان هەبووایە ناچار دەبوون بچن بۆ نووسینگەی دهۆکی پەرلەمانی عێراق، ئەوە جگە لەوەی ژمارەیەک لە هاووڵاتییانی ناوچەکانی مادەی 140ی باشیک و بەرتلە لە ئاکرێن، کە پێویستیان بە حکومەتی فیدراڵ و پەرلەمان دەبێت بۆ کارەکانیان.
لە 12 ئەندامی پەرلەمان لە سنووری بازنەی پارێزگای دهۆک، دووانیان خەڵکی ئاکرێن، کە سەلوان ئاکرەیی و زەیرەک زێباری-ین.
سەلوان ئاکرەیی رایگەیاند، پێشبینی دەکەن تاوەکو مانگێکی دیکە نووسینگەی پەرلەمان لە ئاکرێ بە فەرمی بکرێتەوە.
