رووداو دیجتاڵ
بڕیارە هەفتەی داهاتوو، ئەنجوومەنی پارێزگای نەینەوا لەبارەی دۆسیەی شەهیدانی شارەکە کۆببێتەوە، کە پێشتر سەرۆکی دامەزراوەی شەهیدانی عێراق گوتبووی داعشیان لەنێودایە، ئەندامێکی ئەنجوومەنەکە دەڵێت: بەڕێوەبەری لقی شەهیدانی نەینەوا پێیگوتوون یەک داعشیش لەنێو شەهیدەکاندا نییە.
رۆژی هەینی 28ی ئابی 2026، محەممەد کاکەیی، سەرۆکی لیژنەی ئەمنیی ئەنجوومەنی پارێزگای نەینەوا بە تۆڕی میدیایی رووداوی رایگەیاند: "بڕیارە رۆژی دووشەممە (31ی ئاب) ئەنجوومەنی پارێزگا لەبارەی دۆسیەی شەهیدانی شارەکە کۆببێتەوە کە گوایە داعشیان لەنێودا هەیە و میوانداریی بەڕێوەبەری شەهیدانی نەینەوا بکرێت."
ئەو کێشەیە دوای ئەوە دەستیپێکرد کە عەبدولئیلا نائیلی، سەرۆکی دامەزراوەی شەهیدانی عێراق رایگەیاند، وردبینییان لە ئەنجوومەنی باڵای دادوەرییەوە بەدەست گەیشتووە و دەرکەوتووە، زیاتر لە 17 هەزار داعش، کە کوژراون بە شەهید هەژمار کراون و 12 هەزاریان لە سنووری نەینەوا بوون.
محەممەد کاکەیی رایگەیاند، لەو کۆبوونەوەیەدا پرسیار لە بەڕێوەبەری شەهیدان دەکەن لەبارەی ئەو 12 هەزار شەهیدە، پێشتر قسەیان لەگەڵ کردووە و پێی راگەیاندوون: "تەنیا یەک کەسیش لە شەهیدەکانی نەینەوا نییە داعش بووبێت و ئەگەر ئەوە هەبێت بەرپرسیارێتییەکەی هەڵدەگرێت."
لە 2014 بۆ 2017 شاری مووسڵ و بەشێکی زۆری پارێزگای نەینەوا لەژێر دەستی رێکخراوی داعش بوو.
سەرۆکی لیژنەی ئەمنیی ئەنجوومەنی پارێزگای نەینەوا رایگەیاند ئەو کۆبوونەوەیە بۆ ئەوەیە بیسەلمێنن کە ئەو 12 هەزار شەهیدە داعش نین و دواتر ئەرکی پەرلەمانتارانی نەینەوایە کە داوای میوانداریکردنی سەرۆکی دامەزراوەی شەهیدان بکەن.
