رووداو دیجیتاڵ
سەرۆکوەزیرانی عێراق دەڵێ، عێراق "جەنگێکی نیشتمانی" دژی مادە هۆشبەرەکان دەستپێکردووە و "بووەتە پێشەنگی وڵاتانی ناوچەکە" لە رێگریکردن لە قاچاخچێتی و بازرگانیکردن بە هۆشبەر. ئاماژە بەوەش دەکات، "ئەمە جەنگی پاراستنی نەوەکانی داهاتووە."
ئەمڕۆ هەینی 28ی ئابی 2026 عەلی فالح زەیدی، سەرۆکوەزیرانی عێراق سەردانی بەڕێوەبەرایەتیی گشتیی کاروباری مادە هۆشبەرەکان و کارتێکەرە عەقڵییەکانی سەر بە وەزارەتی ناوخۆی کرد و رایگەیاند، "عێراق لەنێو جەنگێکی سەختدایە دژی گەندەڵی و مادە هۆشبەرەکان. هیچ سڵکردنەوە و پاشەکشەیەک لەم جەنگەدا نییە، چونکە ئەمە جەنگی شکۆ و پاراستنی داهاتووی عێراق و نەوەکانمانە."
زەیدی ئاماژەی بەوەش کرد، داتاکان دەریدەخەن عێراق پێشکەوتنی گەورەی لەم جەنگەدا بەدەستهێناوە و ئێستا لەسەر ئاستی ناوچەکە بووەتە "وڵاتێکی پێشەنگ" لە رێگریکردن لەوەی خاکەکەی وەک رێڕەوێک بۆ گواستنەوەی مادە هۆشبەرەکان بەکاربهێندرێ. گوتیشی، "ئامانجی کۆتاییمان گەیشتنە بە عێراقێکی تەواو پاک و بێ مادەی هۆشبەر."
بەگوێرەی راگەیێندراوی نووسینگەی سەرۆکوەزیرانی عێراق، عەلی زەیدی فەرمانی کردووە بە "گرنگیدانی زیاتر بە چارەسەرکردنی ئالوودەبووان و رەخساندنی ژینگەیەکی گونجاو بۆ گەڕانەوەیان بۆ نێو کۆمەڵگە،" هەروەها دابینکردنی هەموو پێداویستییە تەکنیکی و داراییەکان بۆ بەڕێوەبەرایەتیی مادە هۆشبەرەکان؛ لەگەڵ پێکهێنانی لیژنەیەکی تایبەتمەند بۆ چاودێریکردنی دۆسیەکە و مانگانە راپۆرتی ورد لەبارەی دەستبەسەرداگرتن و لەنێوبردنی مادە هۆشبەرەکان پێشکێش بکەن.
بەگوێرەی وەزارەتی ناوخۆی عێراق، لە نیوەی یەکەمی ئەم ساڵدا سێ هەزار و 553 کەس بە تۆمەتی بازرگانی و بەکارهێنانی مادەی هۆشبەر لە عێراق دەستگیرکراون و تۆنێک و 977 کیلۆگرام مادەی هۆشبەریش لەنێوبراوە.
