رووداو دیجیتاڵ
شانەی راگەیاندنی ئەمنیی عێراق دەڵێ، بکوژی عەمیدەکەی ناوچەی دۆری بەغدا دەستگیرکرا.
فەریق سەعد مەعن، سەرۆکی شانەی راگەیاندنی ئەمنیی عێراق، ئەمڕۆ شەممە 29ی ئابی 2026 بە تۆڕی میدیایی رووداوی راگەیاند:"بەرەبەیانی ئەمڕۆ شانەی هەڵۆکان لە ئاژانسی هەواڵگری و لێکۆڵینەوەی فیدراڵی، بکوژی عەمیدەکەی ناوچەی دۆرەیان دەستگیرد."
سەرۆکی شانەی راگەیاندنی ئەمنیی عێراق گوتی: "بکوژەکە ناوی محەممەد عەبدولمەجیدە".
رووداوەکە رۆژی پێنجشەممە، 27ـی ئابی 2026 روویدا. ئەوکات عەمید نیبراس عەلی، بەڕێوەبەری راگەیاندنی پۆلیسی کەرخ لە بەغدا بە تۆڕی میدیایی رووداوی راگەیاند، پێکدادانێکی چەکداری لەنێوان هێزە ئەمنییەکان و ژمارەیەک لە خاوەن خانووە زێدەڕۆکان لە ناوچەی (کەرارە) لە گەڕەکی دۆرە دروستبووە، ئەوەش لە کاتی جێبەجێکردنی هەڵمەتێک بۆ تێکدانی ئەو خانووانەی بە نایاسایی دروستکرابوون و لە ئەنجامدا ئەفسەرێک بە پلەی عەمید بە ناوی هیشام محەممەد، بەڕێوەبەری پۆلیسی ئەمیندارێتی بەغدا، لەگەڵ کارمەندی پۆلیسی فیدراڵی بەناوی خالید عەباس کوژرا. هەروەها کارمەندێکی پۆلیسی فیدراڵی و چوار فەرمانبەری (ئەمیندارێتی بەغدا) بریندار بوون.
