رووداو دیجیتاڵ
وەزارەتی کارەبای عێراق دەڵێ، بۆ پڕکردنەوەی کورتهێنانی وزە، رۆژانە 1400 مێگاوات کارەبا لە کۆمپانیاکانی کەرتی تایبەت لە هەرێمی کوردستان دەکڕن؛ ئاماژە بەوەش دەکات، پلانیان هەیە بۆ کڕینی 2000 مێگاواتی دیکە لە سعودیە و بەستنەوەی هێڵەکانی کارەبایان بە وڵاتانی دراوسێوە.
ئەحمەد تورکی، گوتەبێژی وەزارەتی کارەبای عێراق، رۆژی یەکشەممە، 30-8-2026، بە تۆڕی میدیایی رووداوی راگەیاند: "بڕی کارەبای بەرهەمهێندراوی ئێستا 24 هەزار مێگاواتە، بەڵام خواست لەسەر بەکارهێنانی لە لووتکەدا دەگاتە نزیکەی 60 هەزار مێگاوات. لە چوارچێوەی هەوڵەکانمان بۆ پڕکردنەوەی ئەو کورتهێنانە، رۆژانە 1400 مێگاوات کارەبا لە کۆمپانیاکانی کەرتی تایبەت لە هەرێمی کوردستان دەکڕین."
چاوەڕوان دەکرێ لە داهاتوودا سەرۆکوەزیرانی عێراق بە یاوەریی وەزیری کارەبای عێراق سەردانی سعودیە بکات. گوتەبێژی وەزارەتی کارەبای عێراق لەو بارەیەوە گوتی: "لەو سەردانەدا گفتوگۆ لەسەر پڕۆژەی بەستنەوەی کارەبا لەگەڵ سعودیە دەکرێ. ئامانج ئەوەیە زەمینەسازی بۆ رێککەوتنێک بکرێ بەمەبەستی کڕینی 2000 مێگاوات کارەبا. دوای واژۆکردنی رێککەوتنەکەش، پرۆسەی بەستنەوەی تەکنیکیی نێوان هەردوو وڵات پێویستی بە 24 مانگ دەبێت."
سەبارەت بە کڕینی کارەبا لە کوێت، ئەحمەد تورکی روونیکردەوە کە عێراق 96%ی کارەکانی لەلایەنی خۆیەوە تەواو کردووە، بەڵام بەهۆی "رووداوە ئەمنییەکانی ئەم دواییەی ناوچەکە" پرۆسەکە لەلایەن کوێتەوە راگیراوە.
بەگوێرەی وەزارەتی کارەبای عێراق، ئێستا عێراق بۆ دابینکردنی کارەبا پشت بە چەند سەرچاوەیەکی دەرەکی دەبەستێت، لەوانە:
- تورکیا: رۆژانە 600 مێگاوات کارەبای لێوە هاوردە دەکات.
- ئوردن: هەرچەندە رێککەوتنەکە بۆ 150 مێگاواتە، ئێستا تەنیا 50 مێگاوات دەگاتە عێراق و زیاتر بۆ ناوچەکانی رۆژئاوای وڵات تەرخان کراوە.
وەزارەتی کارەبای عێراق لە هەوڵدایە لە رێگەی فرەچەشنکردنی سەرچاوەکانی وزە و بەستنەوەی هێڵی نیشتمانی بە وڵاتانی دراوسێ، ئەو کورتهێنانە گەورەیە پڕبکاتەوە کە لە کەرتی کارەبادا هەیەتی، بەتایبەتی کە جیاوازیی نێوان بەرهەمهێنان و خواست زیاتر لە 35 هەزار مێگاواتە.
