رووداو دیجیتاڵ
دەزگای هەواڵگریی عێراق زەید موحاریب، چالاکڤانی تۆڕە کۆمەڵایەتییەکان لە ناو خاکی سووریا دەستگیر دەکات کە لەلایەن دادگەی عێراقییەوە تۆمەتبار کراوە بە ناوزڕاندن و تاوانی رێکخراو.
دەزگای هەواڵگریی عێراق لە راگەیێندراوێکدا دەستگیرکردنی زەید عەلی ئیبراهیم عەلی بڵاو کردەوە کە لە تۆڕە کۆمەڵایەتییەکان بە "زەید موحاریب" ناسراوە.
ئەو دەزگایە رایگەیاند، ئۆپراسیۆنی دەستگیرکردنی زەید موحاریب بە هاوئاهەنگی بووە لەگەڵ دەسەڵاتدارانی سووریا و رادەستی عێراق کراوەتەوە و دراوەتە دادگە.
بەگوێرەی دەزگای هەواڵگری، زەید موحاریب بە چەندین دۆسیەی وەک ناوزڕاندن و تاوانی رێکخراو تۆمەتبار کراوە و چەند فەرمانێکی دەستگیرکردنی هەبووە.
زەید موحاریب یەکێکە لە چالاکڤانەکانی تۆڕە کۆمەڵایەتییەکان لە عێراق و لە رێگەی بڵاوکراوەکانییەوە رەخنەی لە دامەزراوەی سەربازیی عێراق دەگرت.
