رووداو دیجیتاڵ
سەرۆکوەزیرانی عێراق دەڵێت، بۆ پشتیوانیکردنی پڕۆسەی ئاوەدانکردنەوە و گەشەپێدان، پێویستە ئەنجوومەنی نوێنەران 44 پڕۆژەیاسای گرنگ پەسند بکات، لەوانە پڕۆژەیاسای حەشدی شەعبی.
بەگوێرەی راگەیێندراوێکی نووسینگەی راگەیاندنی سەرۆکوەزیرانی عێراق، رۆژی شەممە 5ـی ئەیلوولی 2026، عەلی زەیدی، سەرۆکوەزیرانی عێراق لەکاتی پێشوازیکردن لە فراکسیۆنی ئاوەدانکردنەوە و گەشەپێدان لە پەرلەمانی عێراق، رایگەیاندووە، "44 پڕۆژەیاسا هەن کە زۆر گرنگە لەلایەن پەرلەمانەوە پەسند بکرێن، لەوانەش پڕۆژەیاساکانی دەستەی دەرمان و خۆراک، حەشدی شەعبی و دەستەی چاودێریی نێوخۆیی."
سەرۆکوەزیرانی عێراق ئاماژەی بەوە کردووە، ئاوەدانکردنەوەی وڵات لە رێگەی دەرکردنی ئەو یاسایانەوە دەبێت کە پاڵپشتیی گەشەپێدان دەکەن. زەیدی باسی لە پرسی هەموارکردنەوەی "یاسای وەبەرهێنان" کردووە، کە بەگوتەی ئەو، "بۆ پڕکردنەوەی پێداویستییەکانی عێراق و دابینکردنی ژێرخانی پڕۆژەکان لەلایەن دەوڵەتەوە، بایەخێکی زۆری هەیە."
لە راگەیێندراوەکەدا هاتووە، سەرۆک و ئەندامانی فراکسیۆنەکەی سوودانی، پشتیوانیی "بێمەرج و تەواوی" خۆیان بۆ سەرۆکوەزیرانی عێراق و حکومەتەکەی دەربڕیوە، "بەتایبەتی لە رێکارەکانی پەیوەست بە بەرەنگاربوونەوەی گەندەڵی و چاکسازییە ئابوورییەکان."
بەپێی راگەیێندراوەکە، ئەندامانی فراکسیۆنەکە جەختیان لە پێویستیی پەسندکردنی "یاسای نەوت و گاز" کردووەتەوە و ستایشی دەستپێشخەرییەکەی سەرۆکوەزیرانی عێراقیان کردووە بۆ دابەشکردنی یەک ملیۆن پارچە زەویی نیشتەجێبوون بەسەر هاووڵاتییاندا.
