.webp&w=3840&q=75)
رووداو دیجیتاڵ
وەزارەتی رۆشنبیری و لاوانی هەرێمی کوردستان، سەرکۆنەی هێرشکردنە سەر هاندەرانی یانەی هەولێر لە شاری بەغدا دەکات و داوا دەکات رێکاری یاسایی بەرامبەر سەرپێچیکاران بگیرێتەبەر.
رۆژی شەممە، 5ـی ئەیلوولی 2026، وەزارەتی رۆشنبیری و لاوانی هەرێمی کوردستان لە راگەیێندراوێکدا بڵاویکردەوە، دوای کۆتاییهاتنی یاریی نێوان هەردوو یانەی هەولێر و یانەی شورتە لە خولی ئەستێرەکانی عێراق لە شاری بەغدا، ژمارەیەک لە هاندەرانی یانەی شورتە پەلاماری هاندەرانی یانەی هەولێریان داوە، کە ئەو پەلامارە بووەتە هۆی برینداربوونی چەندین هاندەر و زیانگەیاندن بە پاسەکانی گواستنەوەیان.
وەزارەتی رۆشنبیری ئەو رەفتارە بە "نابەرپرسانە" وەسف دەکات و دەڵێت: "وەرزش پەیامی ئاشتی، تەبایی، رەوشتبەرزی و رێزگرتنی یەکترە، نەک تووندوتیژی و هاندانی گیانی رەگەزپەرستی، کە لێکەوتەی مەترسیداری بۆ پەیوەندییە وەرزشی و کۆمەڵایەتییەکان دەبێت".
لە بەیاننامەکەدا باسی لەوەکراوە، کە پێویستە رێگە نەدرێت ئەم رەفتارانە ببنە هۆی گەشەکردنی گوتاری رق و کینە، بەڵکو دەبێت وەرزش ببێتە مایەی بەهێزکردنی گیانی پێکەوەژیان و هەرێمی کوردستان هەمیشە ماڵێکی ئارام بووە بۆ بەڕێوەچوونی پاڵەوانێتییە نێودەوڵەتی و عێراقییەکان و سەکۆی پێشوازیکردن بووە لە هەموو وەرزشوانان بێ جیاوازی.
وەزارەتی رۆشنبیری داوا لە حکومەتی فیدراڵ دەکات، رێوشوێنی ئەمنی و رێکاری یاسایی بگرنەبەر بۆ پاراستنی گیانی یاریزانان و هاندەرانی یانەکانی هەرێمی کوردستان و سەرپێچیکاران رووبەڕووی یاسا بکەنەوە.
هاوکات داواش لە لیژنەی ئینزیباتی یەکێتیی تۆپی پێی عێراق دەکات، بەپێی پەیڕەوی ناوخۆیی خولی ئەستێرەکان، یانەی سەرپێچیکار بێبەش بکات لە ئامادەبوونی جەماوەرەکەی لە یارییەکانی داهاتوودا.
دوێنێ 4ـی ئەیلوول، یاریی نێوان یانەی هەولێر و شورتە لە شاری بەغدا بەڕێوەچوو. دوای یارییەکە هاندەرانی یانەی شورتە هێرشیان کردە سەر هاندەرانی یانەی هەولێر، جامی پاسەکانیان شکاند و چەندین کەسیش بریندار بوون.
