رووداو دیجیتاڵ
سەرۆکی سەندیکای نووسینگەکانی ئاڵوگۆڕی دراو لە عێراق دەڵێ، کێشەی کەمیی نەختینە بەردەوامە و نزیکەی %80ی دراوی چاپکراوی عێراقی لە دەرەوەی بانکەکان و لە ماڵەکان دایە؛ ئاماژە بەوەش دەکات کە بەهای دینار لە بازاڕەکاندا زیاتر لە ژێر کاریگەریی بڕیارە سیاسییەکان و ململانێ هەرێمییەکانە، نەوەک خواست و خستنەڕوو.
رۆژی یەکشەممە، 6ی ئەیلوولی 2026، زیا تائی، سەرۆکی سەندیکای نووسینگەکانی ئاڵوگۆڕی دراو و نێوەندگیری دارایی لە عێراق بە تۆڕی میدیایی رووداوی راگەیاند: "کێشەی کەمیی نەختینە هێشتا وەک خۆی ماوەتەوە، چونکە بڕێکی زۆری پارە لەلایەن هاووڵاتیانەوە لە ماڵەکاندا هەڵگیراوە، ئەمەش بەهۆی ئەو کێشانەی لە بانکەکاندا روودەدەن، کە بوونەتەهۆی کەمبوونەوەی متمانەی هاووڵاتیان بە سیستمی بانکی."
زیا تائی ئاماژەی بەوە کرد، بەپێی خەمڵاندنەکان، زیاتر لە 90 تریلیۆن دینار لە ماڵەکاندا هەڵگیراوە، ئەمەش لە کاتێکدایە کۆی دراوی چاپکراوی عێراقی نزیکەی 120 تریلیۆن دینارە، واتە نزیکەی %80ی دراوەکە لە سووڕی ئابوورییدا نییە؛ گوتیشی: "هەرچەندە هەوڵی چارەسەرکردن هەیە، بەڵام ئاڵۆزییەکانی ناوچەکە و ململانێی نێوان ئێران و ئەمریکا کاریگەرییەکی راستەوخۆیان لەسەر پرسی نەختینە هەیە."
سەبارەت بە زیادبوونی هەناردەی نەوت و کاریگەری لەسەر داهات، زیا تائی ئاماژەی بەوە کرد کە "عێراق بۆ شەش مانگ کورتهێنانی هەبوو لە هەناردەی نەوت، بۆیە پێشبینی دەکەم دوای شەش مانگی دیکە کاریگەرییەکەی بە رێژەی %60 بۆ %70 لەسەر داهاتی وڵات بمێنێتەوە. بۆ بووژانەوەی تەواوەتی پێویستمان بە ساڵێکی تەواوە."
سەرۆکی سەندیکای نووسینگەکانی ئاڵوگۆڕی دراو باسی لە دۆخی بازاڕی دراو کرد و گوتی: "ئێستا بازاڕ لە جۆرێک لە سستی و وەستاندایە. بەهای دینار بەرامبەر دۆلار نەکەوتووەتە ژێر کاریگەریی خواست و خستنەڕوو، بەڵکو بە بڕیارە سیاسییە ناوخۆیی و دەرەکییەکانەوە گرێ دراوە."
زیا تائی دڵنیایی دا کە پڕۆسەی ناردنی دۆلار لە ئەمریکاوە بۆ عێراق بەردەوامە و ئەوەش بۆ ئابووری عێراق باشە.
