رووداو دیجیتاڵ
سەرۆکوەزیرانی عێراق رایدەگەیێنێت، قۆناخێکی نوێ لەوڵات دا دەستیپێکردووە، بەڵام هێشتا شەڕی تیرۆر کۆتایی نەهاتووە، جەختیش دەکاتەوە کە نابێت چەک و هیچ هێزێک لەدەرەوەی دەسەڵاتی دەوڵەت هەبێت.
لەمەراسیمی کۆتاییهاتنی ئەرکی هاوپەیمانان لە عێراق، عەلی زەیدی، سەرۆکوەزیرانی عێراق گوتارێکی پێشکەش کرد و تیشکی خستە سەر دۆخی ئەمنی و قۆناخی داهاتووی وڵات.
سەرۆکوەزیرانی عێراق لەبارەی مەترسییەکانی تیرۆرەوە گوتی: "شەڕی تیرۆر لەعێراق کۆتایی نەهاتووە." هەروەها ئاماژەی بەدەستپێکی قۆناخێکی دیکە کرد و رایگەیاند: "قۆناخێکی نوێ لەعێراق دەستیپێکرد."
لە بەشێکی دیکەی قسەکانی دا، عەلی زەیدی جەختی لەسەروەریی یاسا و دەزگاکانی دەوڵەت کردەوە و هۆشداری دا: "نابێت چەک لەدەرەوەی دەسەڵاتی دەوڵەت هەبێت، نابێت هیچ هێزێک لەدەرەوەی دەوڵەت هەبێت."
سوپای ئەمریکا و هاوپەیمانیی نێودەوڵەتی رۆژی چوارشەممە کشانەوەی تەواوەتیی هێزەکانیان لە عێراق و هەرێمی کوردستان راگەیاند، بەمەش کۆتایی بە ئەرکێکی سەربازیی 12 ساڵەی شەڕی دژی داعش هات
سوپای ئەمریکا لە ساڵی 2003 بۆ رووخاندنی دەسەڵاتی سەدام حوسێن هاتە نێو خاکی عێراق و لە ساڵی 2011 کشایەوە، بەڵام سێ ساڵ دواتر و لە ساڵی 2014دا، دەسەڵاتدارانی بەغدا داوای هاوکارییان لە هاوپەیمانییەکی نێودەوڵەتی بە سەرکردایەتیی ئەمریکا کرد بۆ شەڕی دژی داعش کە رووبەرێکی فراوانی عێراقی داگیرکردبوو.
