رووداو دیجیتاڵ
کەتیبەکانی حیزبوڵڵای عێراق رایگەیاند، هێشتا فڕۆکەی جەنگی و سیخوڕیی ئەمریکا لە ئاسمانی عێراقدا کاردەکەن و بروسکە هەیە بۆ بەردەوامیی جوڵەی سوپای ئەمریکا تاوەکو 30ی تشرینی یەکەم.
کەتیبەکانی حیزبوڵڵای عێراق، کە یەکێک لە پێکهێنەرانی گروپی موقاوەمەی ئیسلامی لە عێراقە، رۆژی چوارشەممە 30ی ئەیلوول هاوکات لەگەڵ راگەیاندنی کشانەوەی هاوپەیمانان لە عێراق لە راگەیێنراوێکدا دەڵێت: "تاوەکو ئەم ساتەش فڕۆکەی سیخوڕی و جەنگی ئەمریکا لە ئاسمانی عێراق کاردەکەن، ئەمەش بە گوێرەی ئەوەی هەواڵگریی کەتیبەکانی حیزبوڵڵا تۆماری کردووە".
یەکێک لە مەرجەکانی گرووپی مقاوەمە بۆ بەشداریکردن لە پرۆسەی کۆنترۆڵکردنی چەک لە دەستی دەوڵەتدا، کشانەوەی هاوپەیمانان بوو لە عێراقدا.
بەگوێرەی کەتیبەکانی حیزبوڵڵای عێراق: "بروسکە هەیە لەبارەی جوڵەی هێزەکانی ئەمریکا لە عێراق تاوەکو 30ی تشرینی یەکەمی داهاتوو و دواتر وردەکارییەکەی رادەگەیێنن".
پێشتر لە 28ی ئەیلوولی 2026، ئەبو موجاهید عەساف، بەرپرسی ئەمنیی کەتیبەکانی حیزبوڵڵای عێراق لە راگەیێنراوێکدا هەڕەشەی ئەوەش دەکات کە لە یەکى تشرینی یەکەمەوە هەر فڕۆکەیەک ئاسمانی عێراق ببەزێنێت، سەرەتا ئاگادار دەکرێتەوە و دواتر دەخرێتە خوارەوە.
