رووداو دیجیتاڵ
وەزیری دەرەوەی عێراق لە واشنتن رایگەیاند، حکومەتی عێراق رەشنووسی پلانێکی گشتگیری بۆ کۆنترۆڵکردنی چەک بە دەستی دەوڵەت ئامادە کردووە و لە چەند رۆژی داهاتوودا پێشکێشی دەکات.
بەپێی راگەیێندراوێکی وەزارەتی دەرەوەی عێراق، ئەمڕۆ چوارشەممە، 30ی ئەیلوولی 2026، ئەنجوومەنی ئەتڵانتیک لە واشنتنی پایتەختی ئەمریکا لە کۆڕبەندێکدا بە ناونیشانی "عێراق دوای 30ی ئەیلوول"، میوانداریی فوئاد حوسێن، وەزیری دەرەوەی عێراقی کرد.
لە کۆڕبەندەکەدا گفتوگۆ لەبارەی پەیوەندییەکانی واشنتن و بەغدا، داهاتووی هاوکارییە ئەمنییەکان، رووبەڕووبوونەوەی داعش و هەڵوێستی عێراق بەرامبەر ململانێ هەرێمییەکان و سزاکانی سەر ئێران کرا.
تەوەرێکی سەرەکیی کۆڕبەندەکە پرسی چەکدانان و هەڵسوکەوت لەگەڵ گرووپە چەکدارەکان بوو. فوئاد حوسێن لەمبارەیەوە ئاشکرای کرد: "حکومەتی عێراق رەشنووسی پلانێکی بۆ کۆنترۆڵکردنی چەک بە دەستی دەوڵەت ئامادە کردووە و بڕیارە لە رۆژانی داهاتوودا پێشکەش بکرێت، کە خشتەی کاتیی دیاریکراوی بۆ جێبەجێکردن تێدایە."
وەزیری دەرەوەی عێراق وادەی کۆتایی پلانەکەشی خستەڕوو و گوتی: "سەرۆکوەزیران رایگەیاندووە وادەی کۆتایی بۆ تەواوکردنی ئەم پلانە، مانگی حوزەیرانی ساڵی داهاتوو دەبێت."
لە بەشێکی دیکەی کۆڕبەندەکەدا، پرسی ئاسایشی سنوورەکان و دۆخی سووریا و رەنگدانەوەی لەسەر ئاسایشی عێراق تاوتوێ کران. هاوکات جەخت لە رەخساندنی دەرفەت بۆ بەهێزکردنی پەیوەندییە ئابوورییەکان و هاندانی کۆمپانیا ئەمریکییەکان بۆ وەبەرهێنان لە عێراق کرایەوە.
