رووداو دیجیتاڵ
دەستەی دەستپاکی فیدراڵیی عێراق وەرگرتنەوەی تۆمەتبارێکی راکردووی لە دەسەڵاتدارانی لوبنان راگەیاند، کە فەرمانبەری پێشووی تەندروستیی واست بووە و بە بەهەدەردانی نزیکەی چوار ملیار دینار تۆمەتبارە.
ئەمڕۆ پێنجشەممە، 1ی تشرینی یەکەمی 2026، دەستەی دەستپاکی لە راگەیێندراوێکدا ئاشکرای کرد، بە هاوئاهەنگی لەگەڵ پۆلیسی نێودەوڵەتی (ئینتەرپۆل) و لایەنە پەیوەندیدارەکانی لوبنان، تۆمەتباری راکردوو (عەلیاء حەسوونی) دەستگیرکراوە و گەڕێندراوەتەوە بۆ بەغدا.
بەگوێرەی راگەیێندراوەکەی دەستپاکی، تۆمەتبار لە کاتی کارکردنیدا وەک فەرمانبەر لە بەڕێوەبەرایەتیی تەندروستیی واست، لە دوو دۆسیەی جیاوازدا بەشدار بووە لە بەهەدەردانی پارەی گشتی؛ لە دۆسیەی یەکەمدا بڕی دوو ملیار و 855 ملیۆن و 313 هەزار دینار و لە دۆسیەی دووەمدا 923 ملیۆن و 719 هەزار دیناری بەهەدەر داوە، کە کۆی گشتی دەکاتە سێ ملیار و 779 ملیۆن دینار.
پێشتر دادگەی کەتنی واست، بە پشتبەستن بە گوتەی نوێنەری یاسایی، شایەتەکان و ئەنجامی لێکۆڵینەوە کارگێڕییەکان، بە شێوەی پاشملە (غیابی) و بەپێی ماددەی 315 لە یاسای سزادانی عێراقی، سزای زیندانی هەتاهەتایی بەسەر حەسوونیدا سەپاندووە.
هەروەها دادگە بڕیاری دابوو کە دەبێت تۆمەتبار تەواوی بڕە پارە بەهەدەردراوەکە (سێ ملیار و 779 ملیۆن دینار) بگێڕێتەوە بۆ گەنجینەی دەوڵەت، لەگەڵ پێدانی ماف بە لایەنی زیانلێکەوتوو بۆ داواکردنی قەرەبوو دوای پلەی بنبڕوەرگرتنی بڕیارەکە.
