رووداو دیجیتاڵ
بڕیارە شاندێکی باڵای حکومەتی هەرێمی کوردستان بگاتە بەغدا و لەگەڵ وەزارەتی دارایی عێراق کۆببێتەوە. تەوەرەی سەرەکیی کۆبوونەوەکان لە بەغدا جێگیرکردنی شایستە داراییەکانی هەرێمی کوردستانە لە پڕۆژەیاسای بودجەی گشتیی ساڵی 2027دا.
زیاد ئیسماعیل، پەیامنێری تۆڕی میدیایی رووداو لە بەغدا دەڵێ "سبەی شاندێکی حکومەتی هەرێمی کوردستان لە ئاستی باڵادا دەچنە بەغدا بە مەبەستی کۆبوونەوە لەگەڵ وەزارەتی دارایی عێراق، تاوەکو تاوتوێی شایستە داراییەکانی هەرێمی کوردستان بکەن لە نێو پڕۆژەیاسای بودجەی گشتیی ساڵی 2027."
بەپێی زانیارییەکانی رووداو، شاندەکەی هەرێمی کوردستان پێکهاتوون لە، ئومێد سەباح، سەرۆکی دیوانی ئەنجوومەنی وەزیران، ئامانج رەحیم، سکرتێری ئەنجوومەنی وەزیران، لەگەڵ ژمارەیەک لە بەرپرسانی باڵای وەزارەتی دارایی و ئابووریی حکومەتی هەرێمی کوردستان.
ئەم سەردانە درێژەپێدەری زنجیرەیەک کۆبوونەوەی پێشووە، لە ماوەی رابردوودا لەسەر ئاستی تەکنیکی ژمارەیەک گفتوگۆ ئەنجامدراون بە مەبەستی داڕشتنی میکانیزمێکی گونجاو بۆ جێبەجێکردن و جێگیرکردنی داواکاری و شایستە داراییەکانی هەرێمی کوردستان لە نێو بودجەی عێراقدا.
هەر بەپێی زانیارییەکانی پەیامنێری رووداو لە بەغدا، جگە لە دۆسیەی بودجەی 2027، پرسی مووچەی فەرمانبەرانی هەرێمی کوردستان یەکێکی دیکەیە لە تەوەرە گرنگەکان، و بڕیارە سەرەتای ئەم هەفتەیە لیستی مووچەی مانگی نۆی مووچەخۆرانی هەرێمی کوردستان رەوانەی بەغدا بکرێت، تاوەکو لەلایەن وەزارەتی دارایی فیدراڵەوە وردبینی تێدا بکرێت و رێکارەکانی تەمویلی مووچە دەستپێبکەن.
