رووداو دیجیتاڵ
بڕیارە چوارچێوەی هاوئاهەنگی کۆببێتەوە و پرسی دەنگدان بە تەواوکردنی کابینەی وەزاری و پرۆژەیاسای بودجەی 2027 تاوتوێ بکات.
هیشام روکابی، بەڕێوەبەری نووسینگەی راگەیاندنی نووری مالیکی، سەرۆکی هاوپەیمانیی دەوڵەتی یاسا، رۆژی دووشەممە، 5ی تشرینی یەکەمی 2026، بە تۆڕی میدیایی رووداوی راگەیاند، بڕیارە ئێوارەی ئەمڕۆ چوارچێوەی هاوئاهەنگی بە ئامادەبوونی عەلی فالح زەیدی، سەرۆکوەزیران و فالح ساری، وەزیری دارایی عێراق کۆببێتەوە بۆ تاوتوێکردنی دەنگدان بە تەواوکردنی کابینەی وەزاری و پرۆژەیاسای بودجەی 2027.
هاوکات ئەبوو میساق مەساری، ئەندامی مەکتەبی سیاسی رێکخراوی بەدر بە سەرۆکایەتیی هادی عامری ئەمڕۆ دووشەممە بە تۆڕی میدیایی رووداوی راگەیاند، لە کۆبوونەوەکەی ئێوارەی ئەمڕۆدا گفتوگۆ لەبارەی ئاستەنگەکانی بەردەم تەواوکردنی کابینەی وەزاری و پڕکردنەوەی ئەو پۆستە وەزارییانەی ماون، دەکرێ.
سەبارەت بە پرۆژەیاسای بودجە، ئەبوو میساق مەساری ئاماژەی بەوەکرد، پرۆژەکە لە ئەنجوومەنی وەزیرانی عێراقە و گفتوگۆی لەسەر دەکرێ. چەند سەرنج و تێبینییەک لەسەر هەندێک بڕگە و مادەی نێو پرۆژەیاساکە هەیە و لە کۆبوونەوەکەدا باس دەکرێن.
رۆژی 27ی ئەیلوولی 2026، ئەنجوومەنی وەزاریی ئابووریی عێراق پرۆژەیاسای بودجەی 2027 پەسندکرد و رەوانەی ئەنجوومەنی وەزیرانی کرد. رۆژی 7ی ئایاریی 2026 لە پەرلەمانی عێراق لە کۆی 23وەزیر، 14 وەزیری کابینەکەی عەلی زەیدی دەنگیان هێنا، ژمارەیەکیان رەتکرانەوە و تاوەکو ئێستا 9 پۆستی وەزاریی ماوەتەوە.
