رووداو دیجیتاڵ
بڕیارە لە ساڵی 2027 هەڵبژاردنی ئەنجوومەنی پارێزگاکانی عێراق بەڕێوەبچێت؛ کۆمیسیۆنی باڵای هەڵبژاردنەکانیش لەگەڵ لیژنەی دارایی پەرلەمان بەربەستە داراییەکانی بەردەم پرۆسەکە تاوتوێ دەکات.
ئەمڕۆ دووشەممە، 5ی تشرینی یەکەمی 2026، شاندێکی کۆمیسیۆنی باڵای سەربەخۆی هەڵبژاردنەکانی عێراق سەردانی پەرلەمانیان کرد و لەگەڵ لیژنەی دارایی کۆبوونەوە.
جەمال کۆچەر، ئەندامی لیژنەی دارایی لە پەرلەمانی عێراق، بە تۆڕی میدیایی رووداوی راگەیاند: "یەکێک لە تەوەرە سەرەکییەکانی کۆبوونەوەکە، پرسی هەڵبژاردنی ئەنجوومەنی پارێزگاکان بوو کە بڕیارە ساڵی داهاتوو بکرێت، هاوکات لەگەڵ تاوتوێکردنی ئەو ئاستەنگ و بەربەستە داراییانەی لەبەردەم کۆمیسیۆندان، تاوەکو بودجەی پێویستی بۆ دابین بکرێت."
بەگوێرەی یاسای هەڵبژاردنی پەرلەمان و ئەنجوومەنی پارێزگاکانی عێراق، چوار ساڵ جارێک ئەو دوو هەڵبژاردنە دەکرێن.
عیماد جەمیل، سەرۆکی تیمی رۆژنامەڤانیی کۆمیسیۆنی باڵای سەربەخۆی هەڵبژاردنەکان سەبارەت بە کاتی هەڵبژاردنەکە بە رووداوی راگەیاند: "بەگوێرەی یاسا، هەڵبژاردنی ئەنجوومەنی پارێزگاکان چوار ساڵ جارێک دەکرێت، بەو پێیەش وادەی یاسایی لە ساڵی 2027 تەواو دەبێت و پرۆسەکە دەکرێت، بەڵام دیاریکردنی رۆژی دەنگدان لە دەسەڵاتی ئەنجوومەنی وەزیرانی عێراقدایە بە هاوئاهەنگی لەگەڵ کۆمیسیۆن."
دوایین هەڵبژاردنی ئەنجوومەنی پارێزگاکانی عێراق لە 18ی کانوونی یەکەمی 2023 لە کەرکووک و 14 پارێزگای دیکە بەڕێوەچوو، کە 10 ساڵ بوو هەڵبژاردنەکە نەکرابوو.
