رووداو دیجیتاڵ
دواى 50 ساڵ لە راگرتنى، جارێکى دیکە هێڵى دەریایى عێراق (Iraqi Line) دەکەوێتە کار بۆ هەناردە و هاوردەى کاڵا لە کەنداو.
حوسێن کەربەلایی، گوتەبێژى وەزارەتى گواستنەوەى عێراق بە تۆڕى میدیایی رووداوى راگەیاند، بڕیارە گەشتى کەشتییەکانى هێڵى دەریایى عێراق لە 15ى تشرینى یەکەمى 2026 دەستپێبکاتەوە.
عێراق لە رێگەى بەندەرەکانى لە بەسرە بەستراوەتەوە بە وڵاتانى کەنداو، شەش کەشتیى هەیە بۆ گواستنەوەى کاڵا و هاوردەکردنى، لە شەستەکانى سەدەى رابردووەوە گەشتى ئەو کەشتیانەى وەستاوە.
حوسێن کەربەلایی رایگەیاند، یەکەم گەشتى ئەو هێڵە لە بەندەرى جەبەل عەلى ئیماراتەوە دەستپێدەکات بەرەو بەندەرى ئوم قەسر لە بەسرە.
بەندەرەکانى عێراق لە بەسرە یەکێکن لە رێگە سەرەکییەکانی گواستنەوەى کاڵاى هاوردەکراو لە چین و وڵاتانى کەنداو.
گوتەبێژى وەزارەتى گواستنەوەى عێراق دەڵێت، ئەو هەنگاوە وا دەکات کە زۆر لە بازرگانانى عێراق لە رێگەى بەندەرى جەبەل عەلى ئیماراتەوە کاڵاکانیان بە کەشتییەکانى عێراق هاوردە بکەن لەکاتێکدا تەنگەى هورمز بە دۆخێکى تایبەتدا تێپەڕ دەبێت و کەشتییە بیانییەکان هەڵوەستە دەکەن لە گەشتکردن بۆ ئەو سنوورە، هەروەها کەشتییەکانى عێراق لە رێگەى ئەو هێڵەوە کاڵا هەناردە دەکەن.
کەشتییەکانى عێراق بە ناوەکانى حەدبا، موسەنا، بەسرە، بەغدا، ئەسەمعی، قورنە، هەندێکیان پێشتر کاڵایان بۆ کۆمپانیاکان دەگواستەوە.
