رووداو دیجیتاڵ
دەستەی راگەیاندن و گەیاندنی عێراق دەڵێ، لەسەر داوای لیژنەی گواستنەوە و گەیاندنی پەرلەمان، مۆڵەتی کارکردنی کۆمپانیای کۆڕەک تیلیکۆمی بۆ مانگێکی دیکە درێژکردەوە و بەکارهێنەرانی ئەو تۆڕە تاوەکو 1ـی تشرینی دووەمی 2026 دەتوانن کار بە سیمکارتەکانیان بکەن. ئەندامێکی لیژنەی گواستنەوە و گەیاندن لە پەرلەمانی عێراق دەڵێ: "لیژنەکەمان داوای راگرتنی رێکارەکانی کردووە و یەک مانگی دیاری نەکردووە".
پێشتر دەستەکە کۆتایی مانگی ئەیلوولی وەک دوا وادە بۆ راگرتنی کارەکانی کۆمپانیاکە دیاریکردبوو، بەڵام لەبەر بەرژەوەندیی بەکارهێنەران و پێدانی کاتی زیاتر بۆ پاراستنی هەژمار و خزمەتگوزارییە دیجیتاڵییەکانیان، بڕیاریدا وادەکە درێژبکاتەوە.
ئەو بڕیارە نوێیە دوای ئەوە هات کە لیژنەی گواستنەوە و گەیاندنی پەرلەمانی عێراق لە نووسراوێکدا داوای لە دەستەی راگەیاندن و گەیاندن کرد، کاتەکە درێژبکاتەوە.
دەستەی راگەیاندن و گەیاندنی عێراق داوا لە بەکارهێنەرانی کۆڕەک دەکات کە بۆ وەرگرتنی کۆدی دڵنیایی، ئەو مۆڵەتە زیادەیە بقۆزنەوە و ژمارەی یەکێک لە دوو کۆمپانیا مۆڵەتپێدراوەکەی دیکەی عێراق (ئاسیاسێڵ یان زەین) بۆ ئەو ئەپلیکەیشن و پلاتفۆرمانە زیاد بکەن کە رێگە بە تۆمارکردنی زیاتر لە ژمارەیەک دەدەن.
سەبارەت بەو ئەپلیکەیشن و پلاتفۆڕمانەی کە رێگە بە زیادکردنی زیاتر لە ژمارەیەک نادەن، دەستەکە داوا دەکات ئەو ژمارەیەی بۆ مەبەستی دڵنیایی و چالاککردنەوەی هەژمار بەکاردێت، نوێبکرێتەوە و ئەگەر بکرێ، دەستبەرداری ژمارەکەی کۆڕەک نەبن، هاوکات رێگەی دیکەی وەک ئیمەیڵ و ئەپلیکەیشنەکانی دڵنیایی بۆ چالاککردنەوەی هەژمارەکانیان بەکاربهێنن.
بەگوێرەی راگەیێندراوەکەی دەستەی راگەیاندن و گەیاندنی عێراق، 1ـی تشرینی دووەمی 2026 دوا وادەیە و دوای ئەو رێککەوتە، رێکارە رێکخستن و یاساییەکانی تایبەت بە راگرتنی کۆمپانیای کۆڕەک تەواو دەکرێن، بۆیەش داوا لە بەکارهێنەران دەکات پاراستنی هەژمارە دیجیتاڵییەکانیان بۆ رۆژانی کۆتایی دوانەخەن.
عەلی شێخ خاڵس، ئەندامی لیژنەی گواستنەوە و گەیاندن لە پەرلەمانی عێراق، ئەمڕۆ سێشەممە 6ی تشرینی یەکەمی 2026 بە تۆڕی میدیایی رووداوی راگەیاند، رۆژی 22ی مانگی رابردوو، لیژنەی گواستنەوە و گەیاندن نووسراوی فەرمی بۆ دەستەی راگەیاندن و گەیاندنی عێراق کرد، تێیدا داوای کرد رێکارەکان بەرامبەر کۆڕەک رابگرن، تاوەکو وردبینی نووسرا و پەڕاوەکان دەکرێ.
ئەندامەکەی لیژنەی گواستنەوە و گەیاندن گوتی: "لیژنەکەمان داوای راگرتنی رێکارەکانی کردووە و هیچ وادەیەکی دیاری نەکردووە".
دەستەکە ئەوەشی خستووەتەڕوو ئەم رێکارانە بە واتای ئەوە نین کە داوا لە بەکارهێنەران بکرێ سیمکارتەکانی کۆڕەک لەکاربخەن یان دەستبەرداری ژمارەکانیان بن، بەڵکو ئامانج لێی پاراستنی دەستڕاگەیشتنیانە بە هەژمار و خزمەتگوزارییە دیجیتاڵییەکانیان، لەگەڵ پاراستنی مافی بەکارهێنەران و دەوڵەت بەپێی چوارچێوەی یاسایی و رێکخستنی کارپێکراو.
