رووداو دیجیتاڵ
دەستەی دەسپاکیی عێراق "گەورەترین دۆسیەی گەندەڵی و دزینی پارەی گشتی" لە بەڕێوەبەرایەتیی هاتووچۆی سەلاحەدین ئاشکرا دەکات و دەڵێ: "زیاتر لە دوو ملیار دینار دزراوە و دەستکاریی 56 هەزار پسوولەی پێبژاردن کراوە".
دەستەی دەستپاکیی عێراق، رۆژی چوارشەممە، 7ـی تشرینی یەکەمی 2026 رایگەیاند: "تیمەکانی لێکۆڵینەوە لە پارێزگای سەلاحەدین دوای وردبینییەکی چڕ، توانیویانە پەردە لەسەر ئەم گەندەڵییە لابدەن کە چەند ئەفسەرێکی پلە باڵا تێوەگلاون."
بەپێی زانیارییەکانی دەسپاکیی عێراق، بەرپرسی بەشی پێبژاردنەکان لە بەڕێوەبەرایەتیی هاتووچۆی سەلاحەدین، کە ئەفسەرە بە پلەی عەقید، دەستکاریی 34 هەزار و 164 پسوولەی پێبژاردن (غەرامە)ی کردووە.
ئەم ئەفسەرە بڕی یەک ملیار و 853 ملیۆن و 200 هەزار دیناری ئەو پێبژاردنانەی بردووە و ئێستا بە فەرمانی دادوەر دەستگیرکراوە.
هاوکات لە ئۆپەراسیۆنێکی دیکەدا، دەرکەوتووە ئەفسەرێکی دیکەی هەمان بەڕێوەبەرایەتی بە هەمان پلە، دەستکاریی 22 هەزار پسوولەی دیکەی کردووە و بڕی 339 ملیۆن و 135 هەزار دیناری بردووە.
دەستەی دەسپاکیی عێراق دەڵێ: "لێکۆڵینەوەکان سێ ئەفسەری دیکەش دەگرێتەوە کە یەکێکیان پلەی عەمیدە، ئەوەش بەهۆی کەمتەرخەمییان لە وردبینیی پسوولەکاندا کە رێگەی خۆشکردووە بۆ ئەم دزییە گەورەیە."
ئێستا تەواوی پسوولە دەستکاریکراوەکان وەک بەڵگە دەستیان بەسەردا گیراوە و پەڕاوی یاساییان بۆ کراوەتەوە تاوەکو بەپێی مادەی (315) لە یاسای سزادانی عێراقی مامەڵەیان لەگەڵ بکرێت.
